O castelo de Miromesnil é unha residencia de finais do século XVI que se ergue no territorio do municipio francés de Tourville-sur-Arques, no departamento de Seine-Maritime, na rexión de Normandía.

O castelo, de propiedade privada, está inscrito como monumento histórico en Francia.

Historia O castelo fortificado, propiedade da familia Dyel, foi destruído en 1589 durante a batalla de Arques.

O castelo actual construíuse entre 1590 e 1600 aproximadamente por Jacques I Dyel, finado en 1628, e foi rematado polo seu sobriño Jacques II Dyel des Hameaux, conde de Auffay, primeiro presidente da Corte das Axudas de Normandía, e máis tarde conselleiro de Estado e embaixador en Venecia en 1645, a quen se debe a parte central e a disposición maxestosa da fachada norte. Esta está flanqueada por dous torreóns e prolongada por un andar baixo nos extremos, no estilo de Henrique IV. As fachadas foron modificadas en 1640, no estilo Lois XIII. En 1689, o rei elevou as terras de Miromesnil a marquesado a favor de Thomas Hue de La Roque.

O propietario na segunda metade do século XVIII foi Armand Thomas Hue de Miromesnil (1723-1796), terceiro marqués de Miromesnil, primeiro presidente do Parlamento de Ruán e despois garda dos selos de Francia baixo Lois XVI. Morreu alí en 1796. A súa bondade cara á poboación local permitiu que a familia e o castelo atravesasen a Revolución sen contratempos. A súa filla maior, casada cun avogado de Ruán, herdou o castelo.

Os pisos situados nos extremos engadíronse no século XIX.

O castelo foi sucesivamente arrendado e vendido. É o lugar de nacemento de Guy de Maupassant, que naceu alí o 5 de agosto de 1850. A súa familia, que alugaba o inmoble á baronesa de Marescot, propietaria do lugar, residiu alí ata 1853.

En 1895, o castelo foi adquirido por André Le Breton, irmán de Gaston Le Breton.

En 1938 foi comprado por sobriños de Eugène-Melchior de Vogüé. O castelo foi declarado monumento histórico en 1942. En 1945, un incendio destruíu o tellado. En 1998 pertencía á condesa Bertrand de Vogüé. En 2004, o castelo pasou a mans de Jean-Christophe e Nathalie Romatet, netos de Bertrand de Vogüé.

Notas

Categoría:Castelos de Francia