Смерць Джэфры Эпштэйна наступіла 10 жніўня 2019 года. Ахоўнікі выявілі яго без прытомнасці ў турэмнай камеры ў 6:30 раніцы ў Метрапалітэнскім выпраўленчым цэнтры ў г. Нью-Ёрк, дзе фінансіст чакаў суда па абвінавачванні ў гандлі людзьмі ў мэтах сексуальнай эксплуатацыі. Пасля таго, як турэмныя ахоўнікі зрабілі яму штучнае дыханне, Эпштэйн быў дастаўлены з прыпынкам сэрца ў цэнтральную бальніцу Нью-Ёрка, дзе ў 6:39 была канстатавана яго смерць. Судова-медыцынскі эксперт з Нью-Ёрка і генеральны інспектар Міністэрства юстыцыі пастанавілі, што смерць Эпштэйна наступіла ў выніку самагубства праз павешанне. Адвакаты Эпштэйна аспрэчылі заключэнне судмедэксперта і пачалі ўласнае расследаванне, наняўшы патолагаанатама Майкла Бадэна.

Пасля першых падазрэнняў генеральны пракурор Уільям Бар ахарактарызаваў смерць Эпштэйна як «шэраг няўдач». Федэральнае бюро турмаў і генеральны інспектар Міністэрства юстыцыі правялі расследаванне абставінаў яго смерці. Пазней дзяжурным ахоўнікам былі выстаўленыя шматлікія абвінавачванні ў фальсіфікацыі дакументаў. Многія грамадскія дзеячы абвінавацілі ФБР у халатнасці; некалькі заканадаўцаў заклікалі да рэфармавання федэральнай пенітэнцыярнай сістэмы. У адказ Бар звольніў дырэктара Бюро.

З-за парушэнняў звычайных турэмных працэдур у ноч смерці Эпштэйна, няспраўнасці дзвюх камер відэаназірання і яго заяў аб тым, што ён валодае кампраметуючай інфармацыяй аб уплывовых постацях, смерць фінансіста спарадзіла тэорыі змовы аб магчымасці таго, што Эпштэйн быў забіты. Іншыя версіі сцвярджалі, што яго смерць была інсцэніравана.

Арышт і зняволенне

6 ліпеня 2019 года Джэфры Эпштэйн быў арыштаваны ў Нью-Ёрку па абвінавачваннях у гандлі людзьмі ў мэтах сексуальнай эксплуатацыі, і ўтрымліваўся ў папраўчым цэнтры Metropolitan у Ніжнім Манхэтэне. Ён не прызнаў сябе вінаватым. У 2008 годзе яму былі прад’яўленыя аналагічныя абвінавачванні ў Фларыдзе, але ён пазбег федэральных абвінавачванняў у рамках здзелкі з прызнаннем віны. У адпаведнасці з яе палажэннямі ён прызнаў сябе вінаватым у двух крымінальных злачынствах штата, выплаціў кампенсацыю тром дзясяткам ахвяр, выяўленых ФБР, і зарэгістраваўся як сексуальны злачынца як у Фларыдзе, так і ў Нью-Ёрку.

Эпштэйн прапанаваў 600 000 долараў за змяшчэнне пад дамашні арышт, дзе ён бы насіў трэкер на лодыжцы ў сваім таунхаусе ў Нью-Ёрку, але яму адмовілі. Эпштэйн абскардзіў рашэнне аб адмове ў вызваленні пад заклад у апеляцыйным судзе другой акругі ЗША; на момант яго смерці апеляцыя ўсё яшчэ знаходзілася на разглядзе.

У 1:27 ночы 23 ліпеня 2019 года Эпштэйн быў знойдзены ў сваёй камеры ў напаўпрытомным стане з траўмамі шыі. Супрацоўнікі турмы дапыталі яго сукамерніка, які падазраваўся ў шматлікіх забойствах і наркагандлі, Нікаласа Тартальёне. Ён адмаўляў, што прычыніў шкоду Эпштэйну. Унутранае турэмнае расследаванне ўстанавіла, што Тартальёне ніяк не звязаны з гэтай падзеяй. Неназваная крыніца сцвярджала, што Эпштэйн сказаў сваім адвакатам, што Тартальёне нанёс яму цялесныя пашкоджанні. Іншая неназваная крыніца сцвярджала, што сам Эпштэйн інсцэніраваў інцыдэнт, каб яго перавялі ў іншую турму. Спенсер Кувін, адвакат, які прадстаўляў інтарэсы трох ахвяр Эпштэйна, заявіў у ліпені 2019 года, пасля першай відавочнай спробы самагубства Эпштэйна, што, на яго думку, гэта быў замах на яго жыццё і што існуе высокая верагоднасць яго забойства ў турме.

Тады ж, 23 ліпеня, з-за меркаванай спробы самагубства, Эпштэйна змясцілі на суіцыдны нагляд (suicide watch) — рэжым інтэнсіўнага назірання за асобамі, якія лічацца схільнымі да суіцыду. Аднак ужо менш чым праз тыдзень ён быў зняты з гэтага рэжыму і быў пераведзены на рэжым «спецыяльнага назірання» (special observation status), які патрабаваў ад двух ахоўнікаў праводзіць асобныя праверкі кожныя 30 хвілін. Гэта рашэнне было прынята пасля ацэнкі турэмнага псіхолага, які вызначыў, што далейшы суіцыдны нагляд больш не патрабуецца. Па некаторых дадзеных, гэта было зроблена па просьбе адвакатаў Эпштэйна.

Смерць Калі Эпштэйна змясцілі ў ізалятар часовага ўтрымання (ІЧУ), адміністрацыя турмы праінфармавала міністэрства юстыцыі аб тым, што ў яго будзе сукамернік і што ахоўнік будзе зазіраць у камеру кожныя 30 хвілін. У ноч яго смерці гэтыя працэдуры не выконваліся. Сукамерніка Эпштэйна перавялі 9 жніўня, а замену яму так і не прывялі. У дзень сваёй смерці Эпштэйн сустрэўся са сваімі адвакатамі, якія ахарактарызавалі яго як «бадзёрага», пасля чаго ў 19:49 ахоўнік Това Ноэль суправадзіў яго назад у ІЧУ. Запіс з камер відэаназірання паказвае, што два ахоўнікі не змаглі правесці неабходны падлік ва ўстанове а 22:00 і зафіксавалі, як Ноэль ненадоўга праходзіў міма камеры Эпштэйна а 22:30. На працягу ўсёй ночы, у парушэнне звычайнай турэмнай працэдуры, Эпштэйна не правяралі кожныя 30 хвілін. Ахоўнікі, якім было даручана правяраць яго камеру ноччу, Ноэль і Майкл Томас, заснулі за сваім сталом прыкладна на тры гадзіны, а пазней падрабілі адпаведныя запісы. Дзве камеры відэаназірання перад камерай Эпштэйна выйшлі з ладу ў тую ноч. На іншай камеры быў зняты матэрыял, які быў «непрыдатны для выкарыстання».

Неўзабаве пасля 6:30 раніцы 10 жніўня, калі ахоўнікі раздавалі сняданак, Эпштэйн быў знойдзены ў сваёй камеры без прытомнасці з прыпынкам сэрца. Яго знайшлі на каленях з палоскай прасціны, абгорнутай вакол шыі. Прасціна была прывязаная да спінкі яго ложка. Да таго часу ён быў мёртвы ўжо каля двух гадзін. Ахоўнікі зрабілі Эпштэйну штучнае дыханне, і іншыя зняволеныя чулі, як яны крычалі: «Дыхай, Эпштэйн, дыхай». У 6:33 раніцы ахоўнікі паднялі трывогу, паведаміўшы свайму начальніка, якому Ноэль сказаў: «Эпштэйн павесіўся (!) сам». Яго тэрмінова даставілі ў цэнтральную бальніцу Нью-Ёрка, дзе ў 6:39 раніцы фінансіст быў абвешчаны мёртвым. Неўзабаве цела даставілі ў офіс судмедэкперта.

Вынас цела Эпштэйна з камеры быў парушэннем пратаколу, паколькі Федэральнае бюро турмаў (ФБТ) патрабуе, каб да месца самагубства ўжываўся «той жа ўзровень абароны, што і да любога месца злачынства, на якім адбылася смерць». Турэмны персанал нават не змог сфатаграфаваць цела Эпштэйна ў тым выглядзе, у якім ён быў знойдзены.

Смерць Эпштэйна стала першым самагубствам у Метрапалітэнскім выпраўленчым цэнтры за 21 год.

Ускрыццё 11 жніўня галоўны судова-медыцынскі эксперт Нью-Ёрка Барбара Сэмпсан правяла ўскрыццё цела Эпштэйна. Адвакаты э нябожчыка накіравалі патолагаанатама Майкла Бадэна для назірання за працэсам. Пасля ўскрыцця бюро судова-медыцынскай экспертызы паведаміла, што Эпштэйн павесіўся на прасціне са свайго ложка. Яго адвакаты апублікавалі сумесную заяву пасля заключэння судмедэксперта, аспрэчыўшы яго высновы і заявіўшы, што чакаецца больш поўны адказ. Яны заявілі, што каманда абароны цалкам мае намер працягнуць уласнае расследаванне абставінаў і прычын смерці Эпштэйна, уключаючы падачу судовага пазову для прагляду відэазапісу, зробленай камерай у ноч смерці. Пазней яны заявілі, што доказы смерці Эпштэйна значна больш адпавядаюць забойству, чым самагубству.

16 жніўня Сэмпсан абвясціла, што смерць Эпштэйна была кваліфікавана як самагубства праз павешанне. Пазней у супярэчлівых паведамленнях гаварылася, што траўмы, атрыманыя Эпштэйнам, былі ў такой жа ступені звязаныя з удушэннем або забойствам, як і з самагубствам. У справаздачы Сэмпсан гаварылася, што ў яго смерці не было ніякага намеру.

Пасля цела Эпштэйна забраў яго брат Марк. 5 верасня цела было пахавана ў безназоўнай магіле побач з магіламі бацькоў фінансіста ў маўзалеі І. Дж. Морыса «Зорка Давіда» ў Палм-Біч. Імёны яго бацькоў былі выдалены з надмагілля, каб прадухіліць вандалізм.

Рэакцыя Праз некалькі гадзін пасля абвяшчэння смерці Эпштэйна прэзідэнт Дональд Трамп адрэагаваў рэтвітам паведамлення, прысвечанага «падліку ахвяр Клінтанаў» — тэорыі змовы, якая нібыта звязвае смерць Эпштэйна з былым прэзідэнтам Білам Клінтанам і былым дзяржсакратаром Хілары Клінтан. Выступаючы з прамовай у Пенсільваніі праз тры дні, Трамп заявіў журналістам, што хоча «правесці поўнае расследаванне».

Генеральны пракурор Уільям Бар заявіў, што ён узрушаны смерцю Эпштэйна. Ён распарадзіўся правесці расследаванне генеральным інспектарам Міністэрства юстыцыі ў дадатак да расследавання ФБР. Сенатар Бэн Сасэ, старшыня падкамітэту Сената ЗША па наглядзе за судовай сістэмай, пазней напісаў бару ліст, у якім гаварылася: «Міністэрства юстыцыі пацярпела няўдачу». Ён дадаў: «улічваючы папярэднюю спробу самагубства Эпштэйна, яго варта было б замкнуць у пакоі з мяккімі сценамі пад бесперапынным наглядам 24 гадзіны ў суткі, 7 дзён у тыдзень. Відавочна, што галовы павінны паляцець». Прадстаўнік Мэт Гец, які ўваходзіў у юрыдычны Камітэт Палаты прадстаўнікоў ЗША, заклікаў старшыню Джэры Адлера надаць прыярытэтную ўвагу расследаванню абставінаў смерці Эпштэйна ў параўнанні з іншымі расследаваннямі, якія праводзяцца Камітэтам.

Апытанні грамадскай думкі ў 2019 годзе паказалі, што толькі невялікі адсотак амерыканцаў меркаваў, што Эпштэйн пакончыў з сабой: 16 % рэспандэнтаў заявілі, што, на іх думку, Эпштэйн пакончыў з сабой, 45 % меркавалі, што ён быў забіты, а 39 % не ўпэўненыя.

Майкл Бадэн і тэлешоу «60 хвілін» задаліся пытаннем, ці мог Эпштэйн, які быў амаль 6 футаў (1,8 м) ростам і важыў 185 фунтаў (84 кг), павесіцца на ніжнім ложку. На фотаздымках, зробленых пасля смерці, таксама бачныя бутэлькі і лекі, якія стаяць на верхняй койцы. Бадэн таксама задаў пытанне, чаму Эпштэйн не выкарыстоўваў іншыя матэрыялы ў яго камеры, такія як правады і трубкі ад апарата для лячэння апноэ ў сне, якія былі трывалей і даўжэй.

Справаздача аб псіхалагічнай рэканструкцыі смерці Эпштэйна, складзеная ФБТ праз пяць тыдняў пасля яго смерці, мяркуе, што асоба Эпштэйна, «па-відаць, была заснавана на яго багацці, улады і сувязях з іншымі высокапастаўленымі асобамі». Далей у справаздачы гаворыцца, што яго самагубства было звязана з адсутнасцю значных міжасобасных сувязяў, стратай статусу і думкай пра тое, што ён можа правесці рэшту свайго жыцця ў турме.

У культуры У лістападзе 2019 года спрэчны характар яго смерці спарадзіў інтэрнэт-мем «Эпштэйн не забіваў сябе».

Крыніцы

Катэгорыя:Джэфры Эпштэйн Катэгорыя:2019 год у ЗША Катэгорыя:Жнівень 2019 года Катэгорыя:Падзеі 10 жніўня