Рационализм, од ratio —розум, в широком смыслѣ — филозофичный напрям, опертый на пересвѣдчѣню, же людскый розум схопный познавати законы розвою природы и сполоченства. Одты синоним рационализма — интелектуализм.Brand Blanshard. Рационализм ся протиставлять мистицѣ, теологии, иррационализму.
Рационализм в теории познаня В теории познаня (Гнозеология, Епистемология, Ноетика) рационализм — напрям, котрый ся протиставлять сенсуализму. Рационалисты суть пересвѣдчены, же познаня можне лем дякуючи априорным предпокладам, а не чувствам, а единый критерий познаня е тыж лем розум.
Одты другый синоним рационализма — априоризм. Рационалисты вѣрують, же реалита сама од себе мать внуторну логичну штруктуру, а тоту мож осягнути з помочов принципох логикы и математикы.
Закладательом рационализма в нововѣку поважують Рене Декарта. Найкуртшым выкладом рационализма е Декартов славный вырок:
Але зачаткы рационализма мож указати уже в старовѣку. Напримѣр, Платон роздѣльовав просту думку (doxa) од правдивого и певного познаня (epistémé), котрое мож достати лем через познаня идеи (eidos). Тоты идеи суть независимы од людского мыслѣня, але даякым способом ся з его штруктуры одводять. Кедьже суть независимы и екзистують поза людскым розумом, може их чоловѣк осягнути, кедь прийде на достаточный ступень дозрѣлости.
Свого цвѣтучого вѣку досяг рационализм во 18. ст., коли став ся доминантным в свѣтонаглядѣ елит, ба и организуючов силов в державном и сполоченском упорядкованю. Намѣсто традицийных форм и знеужить рационализм понукнув гесло просвѣтительства и рационалного упорядкованя живота. Французска револуция цѣлком одшмарила традичный вывой, зарядила радикалны трансформации державного и сполоченского живота под заставов рационализма. Во сферѣ вѣры рационализм означав одстранѣня чудес з религии и ей основаня на чистом розумѣ и моралцѣ.Révai nagy lexikona. Том 16, с. 1-2. В католицкой дотогды Франции Робеспьер державным декретом зарядив нову деистичну вѣру — Култ Найвысшого Ества (фр. Culte de l'Être suprême).
Вызвы рационализму Рѣшително против рационализма в теории познаня выступали сензуалисты, котры твердили: «нѣт нич в розумѣ, што не было бы перед тым в чутях». Тыж против принципа a priori рационализма ишли емпиристы, подля котрых вшиткы познаня добывають ся a posteriori, лем зо скушености. Емпириста Джон Лок представляв душу чоловѣка як чистый лист, на который скушеность напише свои буквы.
Тота опозиция еще яснѣйше выставать во филозофии Канта, котрый быв на зачатку рационалистом, а позднѣйше прийшов до того погляду, же чутя и розум суть навзаем независимы, а кажде з двох необходный фактор в познаню, так же лем обое въедно творять праве познаня.
Жерела и одказы Brand Blanshard:Rationalism. //Encyclopaedia Britannica. Racionalizmus. //OTVORENÁ FILOZOFICKÁ ENCYKLOPÉDIA. Racionalizmus. //Révai nagy lexikona. 1-21. köt. Révai Testvérek Irodalmi Intézet Részvénytársaság, Budapest. 1911–1935. Том 16, с. 1-2. Рационализм. //Украинский советский энциклопедический словарь в трех томах. / Кудрицкий А.В. и др. (ред.). Главная редакция Украинской Советской Энциклопедии им. М.П. Бажана. К., 1988. Том 3, с. 47.
Референции
Катеґорія:Філозофічны напрямы