O Gran Hotel Bali é un hotel da cidade española de Benidorm (Alacant), o máis alto de Europa. Inaugurado o 17 de maio do ano 2002, foi o edificio máis alto de España desde que superou á Torre Picasso ata novembro de 2006, data en que foi superado pola madrileña Torre Espacio. Ten un total de 186 metros, malia que o plan parcial de construción prevía unha altura de 210 metros. A instalación é de catro estrelas, e ten 52 andares nos que se atopan: 776 habitacións, doce delas suites, 68 suites júnior e outros dez dormitorios sen barreiras arquitectónicas.
Historia e características O Gran Hotel Bali, que está situado na Cala de Benidorm, empezou a construírse en 1990, cun orzamento próximo aos 2.000 millóns de pesetas, e a súa estrutura quedou terminada dez anos despois. A partir dese momento deu comezo a fase de habilitación e decoración de dependencias, distribuídas en dous edificios.
Está considerado como o hotel máis seguro de España xa que dispón de modernos sistemas informáticos para evitar catástrofes: materiais ignífugos, fiestras que se abren automaticamente para deixar saír o fume, portas que se pechan soas para evitar o paso do lume e un sofisticado dispositivo informático capaz de avisar aos técnicos sen a intervención humana.
O Gran Hotel Bali pertence ao grupo Bali, con outros dous hoteis tamén repartidos por Benidorm, nas dúas praias, o Cabana e o hotel Benidorm Center, de tres e catro estrelas respectivamente.
O director do proxecto, o arquitecto Antonio Escario, traballou xunto a un amplo equipo de colaboradores que deseñaron para este hotel unha estrutura en formigón armado, calculada polo Estudo de Enxeñería Florentino Regalado & Asociados para unha superficie total construída de 40.000 metros cadrados.
Anualmente o hotel alberga unha carreira de subida de escaleiras ata o miradoiro, estando a marca en posesión do australiano Paul Crake, que no ano 2003 ascendeu en 4 minutos e 35 segundos.
Desde o Gran Hotel celebrouse o primeiro campionato de salto base, o Spain Base 08. En 2009 empeza o Base Jump Extreme World Championship, o primeiro campionato mundial de salto base, que cada ano dará comezo no Gran Hotel Bali e percorrerá diversas cidades de todo mundo en busca dos mellores saltadores.
Véxase tamén
Outros artigos Lista de rañaceos en Benidorm Ligazóns externas Gran Hotel Bali Urbanity.es - Gran Hotel Bali Competición de Subida de Escaleiras Festival de Xadrez do Gran Hotel Bali Florentino Regalado & Asociados
Bali Bali Categoría:Empresas da Comunidade Valenciana