Pablo Jesús Rodríguez Méndez, nado en Viveiro o 7 de xuño de 1975, é un exfutbolista galego, que xogaba de defensa e centrocampista.
Traxectoria Formouse nas categorías inferiores do Viveiro, e na tempada 1992/93 fichou polo Fabril, da Terceira División. Tras dúas tempadas no filial do Deportivo da Coruña regresou a Viveiro para a tempada 1994/95. Xogou dúas tempadas e media co club da Mariña na Terceira División, actuando como defensa, e en xuño de 1997 fichou polo Lugo, da Segunda B.
Titular indiscutible no equipo de Edrosa, adiantou a súa posición ao centro do campo, e disputou 66 partidos en dúas tempadas, marcando 9 goles. En xuño de 1999 fichou polo Racing de Ferrol, tamén de Segunda B. Na súa primeira tempada no club, con José Ramón Arteche no banco, logrou o ascenso á Segunda División, contribuíndo ademais con 9 goles. Xogou as seguintes tres tempadas na categoría de prata, con Luis César como adestrador, ata que o equipo descendeu na 2002/03. Militou un total de cinco tempadas no club ferrolán, exercendo como capitán nas dúas últimas, disputando 120 partidos e marcando 21 goles. Deixou o equipo despois de conseguir un novo ascenso a Segunda na tempada 2003/04.
Comezou a tempada 2004/05 no Girona, pasando no mercado invernal ao Leganés, disputando 17 partidos entre os dous equipos en Segunda B. Na seguinte tempada, tras uns meses sen equipo, adestrándose en solitario en Viveiro e rexeitando unha oferta do Górnik Łęczna da Ekstraklasa, regresou ao Lugo, desta vez na Terceira División. Conseguiu ascender esa mesma tempada, e xogou dúas máis en Segunda B ata 2008.
Tras un breve paso polo Atlético Baleares, fichou no verán de 2009 polo Compostela, co que non chegou a debutar en partido oficial, deixando o club un mes despois para asinar co CD As Pontes, de Preferente. Ao remate da tempada 2009/10 colgou as botas e converteuse no novo director deportivo do club pontés.
Durante os seguintes anos pasou polos apartados técnicos do Xerez, Valencia e Villarreal.
Notas
Véxase tamén Ligazóns externas
Datos do xogador en BDFutbol .
Categoría:Futbolistas de Viveiro Categoría:Nados en Viveiro Categoría:Centrocampistas de fútbol Categoría:Xogadores do Deportivo Fabril Categoría:Xogadores do Viveiro CF Categoría:Xogadores do CD Lugo Categoría:Xogadores do Racing de Ferrol Categoría:Xogadores do Girona FC Categoría:Xogadores do CD Leganés Categoría:Xogadores do CD Atlético Baleares Categoría:Xogadores da SD Compostela Categoría:Nados en 1975 Categoría:Personalidades de Galicia sen imaxes Categoría:Xogadores do CD As Pontes Categoría:Directores deportivos de fútbol de Galicia