Iste articlo ye sobre o dios d'a mitolochía aragonesa. Ta o mont se veiga l'articlo Pico Os Moros
Balaitús ye un dios u espritu d'a montanya d'a mitolochía aragonesa. Da nombre a o macizo de Balaitús (en francés Balaïtous), conoixiu en aragonés por a suya tuca mas alta, o pico Os Moros.
O dios Balaitús, un d'os mas poderosos d'o Pireneu, gosaba trescruzar os monts cabalgando con o suyo carro volador por dencima d'as nubles y chitar dencima d'os monts y os suyos habitadors rayos y tronadas siempre que s'encarranyaba u quereba divertir-se una mica.
A lechenda de Balaitús y Culibiellas Diz a lechenda que viviban fa muito tiempo en a val de Tena dos dioses, Anayet y Arafita, muit pobres, pero honraus, que teneban una filla dita Culibiellas, intelichent y muit bonica. Culibiellas teneba a-saber-las proposas de matrimonio, pero ella las refusaba siempre, ya que quereba vivir chunto a la suya familia y os animals que bi heba por ixas selvas, mas que mas con as fornigas as suyas millors amigas y companyeras de chuegos. As treballaderas fornigas blancas cubriban tot l'anyo a montanya que Culibiellas heba baltizau con o nombre d'o Fornigal.
Balaitús, o mayor, mas cerenyo y poderoso dios d'o Pireneu s'enamoró de Culibiellas, pero ista, como feba con toda a resta de pretendients lo refusó. Balaitús, qui se deciba controlaba rayos y tronadas y feba tremolar a os monts cuan s'encarranyaba churó raptar-la. Y asinas s'enfiló enta o puesto a on se trobaba a polida filla d'os dioses pirenencos y con tres grans trangos i plego trescruzando os monts.
En veyer-lo a choven diosa Culibiellas chiló gritando a las suyas amigas as fornigas: "A yo todas as fornigas!". Y a escape millons de chicotas fornigas blancas prencipioron a cubrir-la ta protecher-la. Balaitús horrorizau fuyió corriendo, escachando antis a milenta fornigas que i quedoron ta siempre cubrindo o monts d'o Fornigal de color blanca. Como agradecimiento a las fornigas que l'heban aduyau, Culibiellas se clavó un cutiello en o peito ta acullir en o suyo interior a todas as fornigas que heban sobreviviu a la furia de Balaitús. Encara hue se puet veyer iste forau en a penya Foratata y si s'ascuita bien sentir o corazón d'a choven diosa traquitiando por toda a val.
Vinclos externos Brujas, mitos y leyendas en el corazón del Pirineo Aragonés… Sallent de Gállego!!! Historias para pensar. La historia de Culibillas y Balaitús.
Biografía Breve inventario de seres mitológicos fantásticos y misterioros de Aragón. Chema G. Lera. Prames.
Categoría:Dioses pirenencos Categoría:Mitolochía aragonesa