La Fenice sulla lama, scrito da Robert Ervin Howard, el xe un raconto fantasy.
Trama Scominsia co un Conan de mexa età parecià a governare el regno de Aquilonia. Conan gaveva ciapà la corona insanguinà de Aquilonia dal Re Numedide che el ga strangoà sol sò steso trono, tutavia, le robe no le xe ndae ben, parché Conan el se gà visto costreto a inpugnar la pena e posar dò la spada. El popolo de Aquilonia, che al'inisio ghe voleva ben e che lo vedeva come el liberator da le malagraxie de Numedide, desso el scominsia a odiarlo par via che l'è un foresto. I gà costruìo anca na statua in memoria del vecio re inte el tenpio de Mitra, e la zente la bruxa incenso par lù, come se fosse stà un monarca santo morto par colpa de un barbaro.
Volendo dar la corona aquiloniana a un de sangue reale, se forma una banda conossùa come i cuatro ribeli: Volmana, el conte ceo de Karaban, Gromel, el comandante gigante dele legioni nere, Dion, el baron panson de Attalus, Rinaldo, el menestreo mexo mato. I cuatro ribeli i recruta i servisi de un fuorilese de nome Ascalante. Ma de scondoni Ascalante el vol fregare i altri cuatro par ciaparse lù de sol la corona.
Intel steso tempo, Ascalante gà un s-ciavo de nome Thoth-Amon, un stregon potentisimo che vien dala Stygia, che lè cascà dal sò poter perché gà perso l'anèo magico che lo faxeva devegner potente. Par sconderse dai altri magi se gà trasvestìo e dala Stygia xe rivà in Koth dove i predoni de Ascalante io gà ciapà par farlo devegner schiavo.
La storia se incentra sul piano dei cuatro rebeli par copare el Re Conan quando che lè indormensà sul leto. Tutavia vien fora dò fati: Conan xe avvertìo dal Saggio Epemitreus che marchia la spada de Conan con una fenice che rapresenta Mitra, un dio hyborian. Alo steso tempo Thoth-Amon recupera l'anèo e usa el sò poter par copar Ascalante quando che stò ultimo se cata nela stansa de Conan par coparlo. Prima el demonio copa Ascalante e poi Conan se trova costreto a farlo fora.
Altri projeti
Categoria:Proza Categoria:Sensa fonti - arte