Sospel a l'é na comun-a fransèisa ant la region aministrativa dla Provensa-Alp-Còsta Asura, ant ël dipartiment ëd j'Alp Marìtime. As dëstend an sna surfassa ëd 62,39 km², con 3 394 abitant, con na densità ëd 54 abitant al chilòmeter quàder.
La sità a resta an sle doe rive dla Bévéra, che dal sécol ch'a fa XI a son lià dal vej pont: an soa tor a l'avìo stabilije un pedage.
Ël patron a l'é l'arcàngel Michel.
Stòria Dël V sécol a l'era sede ëd vësco. A l'é stàit comun-a lìbera dla Provensa, peui dla Savòja, ant l'età ëd mes. Dël sécol ch'a fa XVIII a l'é stàit contà con ij féod ëd Moulinet e Castillon.
Sospel a l'era un pont ëd passage dla stra dla sal; ant ël sécol ch'a fa XI la località a l'era ciamà Hospitellum, miraco për la presensa d'un pòst ëd sosta butà su da l'órdin dj'Ospidalié.
Dël 1944 a l'ha avù la Cros ëd guèra.
Leu d'anteresse Catedral ëd San Michel
Eveniment e manifestassion Durant le Baroquiales, festival d'art baròca la prima quindzen-a ëd luj, për tre di a Sospel as ten-o dij consert ëd mùsica baròca, animassion an sle stra, degustassion e via fòrt.
Mërcà Ël mërcà an ten la dumìnica 'd matin an piassa dla Cabraïa e al giòbia an piassa Gianotti. A San Michel as ten ël mërcà dij produtor regionaj.
Categorìa:Comun-e dël dipartiment ëd j'Alp Marìtime