Plan-de-Baix a l'é na comun-a fransèisa ant la region aministrativa d'Alvernia-Ròno-Alp, ant ël dipartiment dël Drôme. A së stend për na surfassa ëd 19,39 km², con 141 abitant (2023) , con na densità ëd 7 ab/km².
Geografia Plan-de-Baix a resta a 46 km a est ëd Valence e a 22 km a nòrd-est ëd Crest . A l'é situà al sud dël Parch Natural Regional dël Vercors, an tra le valade dla Gervanne e dël Rieussec. Ël pais a l'é dominà da la montagna 'd Vellan (954 m), na gròssa falesia rocosa ch'a smon na vista panoràmica .
Stòria Ël teritòri a l'ha d'orìgin preistòriche, con presense gàliche già dël 500 a.C. Ij Gaj a l'han dàit ij nòm ai leugh: Baix (la sorgiss), Brion (ël pòst an aut) e Vellan (Montagna dël vent). Ij Roman a son ëstabilisse an sle pian-e e l'ocupassion a l'é continuà ant l'Età 'd Mes .
Ant l'Età 'd Mès a-i ero tre fèod: Ël castel dël Brion (an sla montagna 'd Vellan), sità dël 1212. Ël castel ëd Baix, fèod dij Poitiers, cont ëd Valentinois, mensionà dël 1191. La Bâtie de Baix, ch'a së slargava d'antorn al castel atual. Ël nòm "Plan de Baix" a compariss mach al prinsipi dël sécol XVI, quand ij doi fèod a son unisse sota 'l midem sgnor .
Ël pais a l'era prevalentement protestant e, durant le persecussion, ij protestant as ëstërmavo ant le balme për fé sò cult. Jë sgnor ëd Montrond a son restà a Plan-de-Baix dal 1650 fin-a a la Rivolussion fransèisa .
Ant ël sécol XIX a-i ero 394 abitant, e la comun-a a vivìa mach d'agricoltura. Durant la Sconda guèra mondial, Plan-de-Baix a l'é stàit bombardà ant n'atach avion. Un monument ai mòrt a rend onor ai resistent dla Val dël Gervanne .
Leu d'anteresse La montagna dël Vellan (954 m), con na gròssa cros àuta 11 méter ch'a simboleja la reconciliassion antra catòlich e protestant. Ël castel ëd Montrond (proprietà privà), dël sécol XVIII, con na tor rionda e 'd finistrèle a crosiera . La cascà dla Druise, a 2,5 km a nòrd-est dël pais . L'antica colònia ëd vacanse fondà dël 1933, dventà ca familiar dël 1938 e ancheuj conossùa com "l'Eterlou" .
Aministrassion Ël sìndich a l'é André Cannie, an càrica dal mars 2008 .
Categorìa:Comun-e dël dipartiment ëd Drôme