Guy Braibant a l'era nassù a Paris ai 5 dë stèmber dël 1927, an na famija borzoà. Sò pare a l'era diretor dj'archivi ëd Fransa; soa mare a l'era n'ebréa d'orìgin egissian-a.
Cand ch'a-i s-ciòpa la sconda guèra mondial, Braibant a l'é anlev al liceo Janson-de Sailly; a l'era cambrada ëd Jean-Pierre Lotte, che dël 1944 a l'ha massà un tedësch prima d'esse arestà e fusilià. Pòch apress, Braibant a l'é intrà ant ël PCF.
Laureà an litre e an drit, diplomà a l'Anstitù dë studi polìtich ëd Paris, dël 1953 a seurt da la Scola Nassional d'Aministrassion. Peui a intra al Consèj dë stat, anté ch'a farà scasi tuta soa cariera.
Dël 1975 a l'é un dij redator dël Proget ëd diciara dle libertà, publicà dai comunista. Con la vitòria ëd François Mitterrand a l'elession pressidensial dël 1981, Braibant a l'é ancarià ëd mission dapress ël ministr dij traspòrt, Charles Fiterman. Dël 1984 ij ministr comunista a chito ël goern, cand Laurent Fabius a rampiassa Pierre Mauroy. Ant ës moment, Braibant a romp con ël PCF.
Dal 1978 a l'é consejé dë stat. Dël 1985 a smija dovèj dventé pressident ëd la session dij contrast dl'àuta giurisdission aministrativa, ma la possìbil promossion d'un comunista (bele ch'a-l l'era pì nen) a fà monté l'oposission ant ël Consèj dë stat. Mitterrand a ced a la pression; tanme consolassion, Braibant a l'é nominà a la pressidensa dla comission djë studi e dij rapòrt. Dël 1988 a l'é stàit pressident ëd la comission ëd travaj antërministerial Bioética e drit e dal 1989 al 2005 vice-pressident ëd la comission superior ëd codificassion. A l'ha arpresentà la repùblica fransèisa ant l'osservatòri europengh ëd lòta contra 'l rassism e l'anti-semitism (n'òrgo dl'Union Europenga) e dal 1989 a l'era mèmber dla comission nassional consultativa dij drit ëd l'òm.
Braibant a l'é stàit në spessialista arconossù ant ël camp dël drit aministrativ. Sò lìber Les grands arrêts de la jurisprudence administrative a resta n'arferiment autoritativ.
A l'é mòrt a Paris ai 25 ëd maj dël 2008, për ël fërmesse ëd sò cheur.
Euvre prinsipaj Les grands arrêts de la jurisprudence administrative (prima edission 1956) Les archives en France (1996) Données personnelles et société de l'information (1998)
Braibant, Guy