Rafèu Sichel-Bazin, neishut lo 30 de mai de 1981 a París, es un lingüista reconegut per sos trabalhs sus la fonologia, la fonetica e la prosodia de las lengas romanicas, en particular l’occitan, lo francés e lo catalan.
Biografia
Enfança e educacion En 1995, arriba au licèu Jay de Beaufort a Peireguers, on obtien lo son Bac en cordèra S en 1998. S'inscriu un an en Classa Preparatòria a las Escòlas Granas (CPGE) en Biologia, Quimia, Fisica e Sciéncias de la Tèrra (BCPST) au licèu Pierre de Fermat a Tolosa, puish en DEUG, licéncia e mestresa en biologia (especialitat fisiologia animau e immunologia) a l'Universitat Paul Sabatier. En parallèl, obtien un DEUG e ua licéncia en Lengas e culturas regionaus mencion occitan a l'Universitat de Tolosa - lo Mirail.
Quand èra mès joen, envisatjava ua carrièra dins las sciéncias exactas puslèu que dins las sciéncias umanas e sociaus. Apassionat per la biologia, comença per seguir estudis dins aquera disciplina, que considèra coma la mès umana e paupabla de las sciéncias. Descobreish puish la lingüistica, que percep coma lo costat mès scientific de las sciéncias umanas. Mercés au sistèma educatiu francés, qui permet ua reorientacion de las sciéncias de cap a las letras, Rafèu Sichel-Bazin se reorienta e causeish fin finala aquera via.
La musica occitana dins la sua vida
Son interès per l'occitan nèish quan s'installa en Peiregòrd en 1991, pensant que la lenga i èra enqüèra correntament parlada. Estúdia au collègi de las Chastenadas a Moissídan. Decebut de non pas l'enténer dens la vita vitanta, desira començar son aprendissatge dambe dauna Spitaëls, ensenhanta en matematicas qui balha cors sus son temps liure, mes, lassa de la complexitat d'aquera tasca deguda a las variacions dialectaus, l'ensenhaira abandona l'ensenhament de l'occitan. Aquesta cedeish a Rafèu libes en occitan.
En 1994, intègra un grop folcloric on descobreish lo cant e las danças tradicionaus occitanas. Se passiona per la musica e apren a jogar la cabreta e la sonsaina dab Marcel Piaud, originari de Champanha e Fontanas au nòrd de Peiregòrd, mas installat a Brageirac. Au contra de l'ensenhament abituau e formau de la musica, apren purmèr a jogar abans d'estudiar lo solfègi, çò que facilita son aprendissatge. Se vira puish cap tà l'acordeon diatonic, mès leugèr, qui tròba tanben mès portadís e versatil. En parallèl, apren l'occitan dins lo grop de musica Las Belutas dau Canton atau coma au près deu Majorau deu Felibritge Pierre Borie-Duclaud.
A Tolosa, persegueish lo son engatjament musicau en jogant dab diferents grops coma “Los d'enlòc” aus costats de Guillaume Lopez.
En 2001, parteish s'installar a Sabadell en Catalonha.
Entre 2005 e 2012, ensenha l'acordeon diatonic a l'Aula de Música Tradicional i Popular deu Departament de Cultura de la Generalitat de Catalunya e jòga l'acordeon e canta dins divèrs grops de musica coma Rauxa e Mirabèl, abans de méter la sua carrèra musicau entre parentèsis per se consacrar au son doctorat.
Cursus professionau
En 2001, tribalhant a l'Arxiu Occità de l'Universitat Autònoma de Barcelona en collaboracion dab Antoni Rossell, participa a la recepcion deus hons de la correspondéncia de Bernard Lesfargues, un escrivan, editor e traductor de Peiregòrd. Organizan conferéncias on receben personalitats granas coma Robert Lafont e Pèire Bec.
La sua tèsi, entitolada Prosodic systems in contact: Occitan and French, codirigida per las professoras Pilar Prieto (Universitat Pompeu Fabra, Barcelona) e Trudel Meisenburg (Universität Osnabrück, en Alemanha), qu'explòra l'interaccion entre aqueras duas lengas au nivèu prosodic. La sostien a l'Universität Osnabrück en junh de 2015 .
Après lo son doctorat, realiza dus pòstdoctorats a l'Universitat Tolosa-Joan Jaurés entre 2015 e 2016 :
Lo projècte « Symila » dab Patric Sauzet e Anne Dagnac (Laboratòri CLLE) Ua recèrca sus « lo ròtle de l'accentuacion iniciau dins l'estructuracion prosodica en francés : fonologia au tractament de la paraula » dab Corine Astésano (Laboratòri Octogòne-Lhordat).
Ocupa puish divèrs emplecs, dont un pòst temporari de professor de SVT au Collègi Calandreta del País Tolzan, en esperant obtiéner un pòst universitari a l'universitat.
Lo lingüista A l'estiu de 2017, torna a Barcelona. En 2019, la partença a la retirada de Patric Sauzet libèra ua plaça d'ATER (Estacat Temporari d'Ensenhament e de Recèrca) a l'Universitat Tolosa-Joan Jaurés, que Rafèu Sichel-Bazin aucupa pendent dus ans. En 2021, obtien ua plaça de mèstre de conferéncias en lingüistica occitana dins aquera universitat.
Especialista en fonologia, fonetica, prosodia, intonacion e dialectologia, tribalha sus las interfàcias entre sintaxi e fonologia, pragmatica e fonologia, atau coma sus fenomèns de contacte lingüistic e de multilingüisme.
Las suas recèrcas pòrtan principaument sus :
La fonetica e la fonologia de l'occitan e de las lengas romanicas,
L'accentuacion e la prosodia en francés e en occitan,
Las dinamicas deu contacte lingüistic enter lengas romanicas.
Las suas òbras son reconegudas dins lo domeni de la lingüistica, e participa a conferéncias e collòquis internacionaus sus la fonetica e la prosodia de las lengas romanicas. Qu'ei tanben membre deu burèu deu conselh lingüistic deu Congrès permanent de la lenga occitana.
Sus son temps liure, organiza dambe Cécile Noilhan ensenhaira-cercaire en literatura occitana contemporanèa, talhèrs de cant tradicionau occitan dab los estudiants de l'Universitat Tolosa-Joan Jaurés.
Bibliografia principala
Capítols d’obratges :
Sichel-Bazin, Rafèu (2025): "Prosodie et interfaces" (capítol 10), in: Esher, Louise & Sibille, Jean (Eds.): Manuel de linguistique occitane. Berlin, Boston: De Gruyter, 259-286. Sichel-Bazin, Rafèu; Meisenburg, Trudel & Prieto, Pilar (2015): “Intonational phonology of Occitan: towards a prosodic transcription system”, in: Frota, Sónia & Prieto, Pilar (Eds.): Intonational variation in Romance. Oxford: Oxford University Press. Delais-Roussarie, Elisabeth; Post, Brechtje; Avanzi, Mathieu; Buthke, Carolin; Di Cristo, Albert; Feldhausen, Ingo; Jun, Sun-Ah; Martin, Philippe; Meisenburg, Trudel; Rialland, Annie; Sichel-Bazin, Rafèu & Yoo, Hi-Yon (2015): “Developing a ToBI System for French”, in: Frota, Sónia & Prieto, Pilar (Eds.): Intonational variation in Romance. Oxford: Oxford University Press. Prieto, Pilar; Borràs-Comes, Joan; Cabré, Teresa; Crespo-Sendra, Verònica; Mascaró, Ignasi; Roseano, Paolo; Sichel-Bazin, Rafèu & Vanrell, Maria del Mar (2015): “Intonational phonology of Catalan and its dialectal varieties”, in: Frota, Sónia & Prieto, Pilar (Eds.): Intonational variation in Romance. Oxford: Oxford University Press.
Atlàs en linha:
Prieto, Pilar; Sichel-Bazin, Rafèu & Meisenburg, Trudel (Coords.) (2007-). Atlàs interactiu de l’intonacion de l’occitan. https://prosodia.upf.edu/atlasintonacion/index.html. Bibliografia completa: https://occitan.univ-tlse2.fr/rafeu-sichel-bazin Categoria:Linguista Categoria:Occitan Categoria:Linguistica occitana