Bastian Schweinsteiger () er ein tysk tidlegare fotballspelar frå Kolbermoor, særleg kjend for sine 13 år i Bayern München. Med FC Bayern var han med å vinne bundesligaen åtte gongar og UEFA-meisterligaen i 2013, eit år då laget tok den store trippelen, med triumf i både bundesligaen og i pokalturneringa. I 2014 vart Schweinsteiger verdsmeister i 2014 med Tyskland sitt landslag. Han var opphavleg kantspelar, frå 2009 sentral midtbanespelar. Kåra til årets spelar i Tyskland i 2014.
Klubbspel Schweinsteiger debuterte på Bayern München sitt fyrstelag i november 2002. I løpet av den fyrste sesongen fekk han fast plass i fyrste-ellevaren og var ein sentral spelar i laget det neste tiåret. Åtte av dei tretten åra med FC Bayern vann han bundesligaen og sju gongar vann laget DFB-pokalen. Schweinsteiger bidrog til at Bayern München tok seg til finalen i meisterligaen i 2010, 2012 og 2013. Etter tap 0–2 mot AC Milan i 2010, stod det i 2012 1–1 etter 120 minutt mellom FC Bayern og Chelsea FC. I den etterfylgjande straffeskytinga mislukkast Schweinsteiger som femte eksekutør for FC Bayern, så Chelsea stakk av med trofeet. Året etter spelte han heile kampen då FC Bayern vann med 2–1 over Borussia Dortmund i meisterliga-finalen. Sommaren 2015 vart Schweinsteiger overført til Manchester United mot 9 millionar euro. Etter lite speletid i den andre sesongen, reiste han i mars 2017 til Chicago Fire i USA der han var aktiv til 2019.
Landslagsspel Schweinsteiger fekk sin fyrste landskamp for Tyskland i 2004. Gjennom dei neste 12 åra spelte han 121 landskampar og skåra 24 mål. Han skåra to av måla då Tyskland slo Portugal 3–1 i bronsefinalen under Fotball-VM 2006. 11. februar 2009 spelte han heile kampen då det vart tap 0–1 mot Noreg i Düsseldorf. Bortsett frå opningskampen under Fotball-VM 2014 i Brasil, deltok han i alle kampane i ein meisterskap som enda med finaletriumf over Argentina. Schweinsteiger var tysk kaptein i 13 landskampar, mellom anna då Tyskland slo Finland i hans siste landskamp 31. august 2016.
Merittar Verdsmeister: 2014 for Tyskland VM-bronse: 2006 og 2010 for Tyskland EM-sølv: 2008 for Tyskland EM-bronse: 2012 for Tyskland Vinnar av UEFA-meisterligaen: 2013 for Bayern München Tysk ligameister: 2003, 2005, 2006, 2008, 2010, 2013, 2014, 2015 for Bayern München Vinnar av DFB-pokalen: 2003, 2005, 2006, 2008, 2010, 2013, 2014 for Bayern München
Kjelder
Denne artikkelen bygger på «Bastian Schweinsteiger» frå , den 12. september 2026.
eu-football
Kategori:Tyske fotballspelarar Kategori:Bayern München-spelarar Kategori:Spelarar i Fotball-EM 2004 Kategori:Spelarar i Fotball-VM 2006 Kategori:Spelarar i Fotball-EM 2008 Kategori:Spelarar i Fotball-VM 2010 Kategori:Spelarar i Fotball-EM 2012 Kategori:Spelarar i Fotball-VM 2014 Kategori:Spelarar i Fotball-EM 2016