Гордон Мередит Лајтфут Помладиот (англ. Gordon Meredith Lightfoot Jr.; 17 ноември 1938 - 1 мај 2023) ― канадски кантавтор и гитарист кој забележал меѓународен успех во фолк, фолк-рок и кантри-музиката. Помогнал во дефинирањето на фолк-поп звукот од 1960-тите и 1970-тите и се смета за најистакнат канадски текстописец. Објавил неколку златни и мулти-платинести албуми и песни, препеани од некои од најреномираните светски музички уметници. Биографот на Лајтфут, Николас Џенингс, рекол: „Неговото име е синоним за безвременски песни за возови и бродоломи, реки и автопати, љубов и осаменост“.
Лајтфут бил роден на 17 ноември 1938 година во Орилија, Онтарио и имал шкотско потекло. Во 1958 година се преселил во Лос Анџелес за да студира џез-композиција и оркестрација на музичкиот колеџ „Вестлејк“. Некои од неговите најпознати песни се: „Ribbon of Darkness“ (1965), „Early Morning Rain“ (1966), „If You Could Read My Mind“ (1970), „Sundown“ (1974); „Carefree Highway“ (1974), „Rainy Day People“ (1975) и „The Wreck of The Edmund Fitzgerald “ (1976).
Роби Робертсон од канадската рок-група The Band го опишал Лајтфут како „национално богатство“. Боб Дилан, кој исто така бил обожавател на Лајтфут, го сметал за еден од неговите омилени текстописци и рекол: „Не можам да се сетам на песна од Гордон Лајтфут што не ми се допаѓа. Секогаш кога слушам негова песна, некако посакувам да трае вечно...“. Лајтфут бил истакнат музички изведувач на церемонијата на отворање на Зимските олимписки игри 1988 година во Калгари.
Како поединец, освен разните награди поврзани со неговите албуми и синглови, Гордон Лајтфут добил шеснаесет награди „Џуно“, ASCAP награди за пишување песни во 1971, 1974, 1976 и 1977 година и бил номиниран за пет Греми-награди. Во 1980 година бил прогласен за канадски пејач на деценијата, за неговата работа во текот на 1970-тите. Лајтфут бил примен во Куќата на славата на канадската музика во 1986 година и во Куќата на славата на канадската кантри-музика во 2001 година. Бил примен на Канадскиот булевар на славните во 1998 година. Во мај 2003 година бил прогласен за придружник на Редот од Канада. Лајтфут бил член на Редот на Онтарио, највисока чест на регионот Онтарио. На 24 јуни 2012 година, Лајтфут бил примен во Куќата на славата на текстописците.
Лајтфут починал на 1 мај 2023 година од природна смрт во Торонто, на 84-годишна возраст.
Дискографија Lightfoot! (1966) The Way I Feel (1967) Did She Mention My Name? (1968) Back Here on Earth (1968) Sit Down Young Stranger (aka If You Could Read My Mind) (1970) Summer Side of Life (1971) Don Quixote (1972) Old Dan's Records (1972) Sundown (1974) Cold on the Shoulder (1975) Summertime Dream (1976) Endless Wire (1978) Dream Street Rose (1980) Shadows (1982) Salute (1983) East of Midnight (1986) Waiting for You (1993) A Painter Passing Through (1998) Harmony (2004) Solo (2020)
Поврзано
Канадска музика
Наводи
Надворешни врски
страница од Канадска енциклопедија страница на canadianbands.com Дигитални архиви на CBC: Гордон Лајтфут: Народен лауреат на Канада
Гордон Лајтфут - Канадска фондација за комуникации Интервју со Гордон Лајтфут во „Songwriter Magazine“ на Меѓународната асоцијација на текстописци Gordon Lightfoot Документарец од 2019 година за Гордон и неговата кариера
Категорија:Починати во 2023 година Категорија:Родени во 1938 година Категорија:Канадски кантавтори Категорија:Добитници на Џуно награда Категорија:Канадски поп-пејачи Категорија:Канадски пејачи Категорија:Канадски гитаристи