El Palazz Citeri (Palazzo Citterio in italian) a l'è un palazz de Milan del Milasetcent che, del ses de dicember del 2024 l'è sed de la sezzion del Vot e Noeuvcent de la Pinacoteca de Brera.
Storia El palazz l'è stad fad su per la familia Citeri, originaria del Lissandrin ma de temp a Milan, del secol XVIII e l'è poeu crompad prima di Fürstenberg e poeu di bancher Rosenberg Colorni. L'è poeu crompad, del 1972, del stat, 'me part del proget de la Gran Brera, insì de metégh dent 'na part de la collezzion del Palazz de Brera e anca di center studi e ricerca.
Per fàll sgiamò di agn '80 scomincen di lavorà de restaver e de repensament di spazzi e in tra el 2012 e 'l 2018 gh'è la part pussee granda de 'sti lavorà, che vann poeu inanz anca sota la direzzion del James Bradburne e de l'Angelo Crespi che, diretor del 2024, el ved la soa fin, cont i ultim lavor in su l'aria condizzionada, el fà pussee dura la strutura e di noeuv alestiment che inn fad in tra sgiugn e otover.
I lavorà però inn stad bei longh e pien de problema: dopo de una vertura provisoria del 2010 per una mostra del Paul McCarthy a l'è ocupad, el 19 de masg 2012, del center social Macao, apena dopo che la polizzia i haveva caciad de la Torr Galfa che haveven ocupad prima: inn mandad via el 22 cont un gran intervent de polee, carabiner e anca soldad.
Del dicember 2024 la gh'ha dent tucc i quader de la collezzion de Brera che inn stad fad dopo del 1861, cont oeuvere de artista compagn del Boccioni e del Picasso.
Architetura Classegh palazz nobiliar de la soa epoca, el dà in su la Via Brera: denanz gh'è di pogioeui elegant de ferr con di arabesch. Se va dent del pian terra, indova che gh'è la bilietaria, e in la veggia cort a gh'è un tempiet de legn, ispirad al Sposalizzi de la Vergin del Rafaell e che l'è stad donad del Salon del Mobil de Milan.
Collezzion A andà dent, in la bilietaria, se troeuva un tavol-scoltura, indova che se venden anca di liber e che 'l gh'ha di line curve.
De un scalon monumental se po andà poeu in alter trii pian: el prim, quell nobil, el gh'ha una sala progetada de l'Isabella Marelli e indova che gh'è el quader "Fiumana" del Giuseppe Pellizza da Volpedo, che l'è el studi de "El Quart Stat", oltra ai do collezzion permanent, o ben quella Jesi, che la va vers via Brera, e quella Vitali, che la va vers el giardin, che 'l confina con l'Ort botanegh de Brera.
Al pian interrad e al segond pian se troeuven i mostre temporanee.
Autor in mostra
Afro Basaldella (1912-1976) Giovanni Boldini (1842-1931) Pierre Bonnard (1867-1947) Gino Bonichi (1904-1933) Umberto Boccioni (1882-1916) Renato Birolli (1905-1959) Georges Braque (1882-1963) Massimo Campigli (1895-1971) Carlo Carrà (1881-1966) Adriano Cecioni (1836-1886) Giorgio De Chirico (1888-1978) Filippo De Pisis (1896-1956) Maurice Estève (1904-2001) Silvestro Lega (1826-1895) Osvaldo Licini (1894-1958) Mario Mafai (1902-1965) Antonietta Raphael de Simon Mafai (1895-1975) Marino Marini (1901-1980) Amedeo Modigliani (1884-1920) Giorgio Morandi (1890-1964) Pablo Picasso (1881-1973) Giuseppe Pellizza da Volpedo (1868-1907) Gaetano Previati (1852-1920) Serge Poliakoff (1900-1969) Odilon Redon (1840-1916) Ottone Rosai (1895-1957) Alberto Savinio (1891-1952) Gino Severini (1883-1966) Mario Sironi (1885-1961) Ardengo Soffici (1879-1964) Theo van Rysselberghe (1862-1926) Otto Wolfgang Schulze (1913-1951)
Per l'art pussee veggia gh'è di oeuvere del Leonardo da Vinci, de l'Alberto Sozio, del maester de la pala Poldi Pezzoli e del San Martin a la Palma.
Riferiment
Ligam de foeura Sit ofizzial
Alter proget
Citeri