La strologia l’è un insema de prateghe divinatorie che dann fœura dei informazzion sora i aveniment che capiten in la vita dei omen cont el studià la posizzion di corp del cel. Quest’art chì la se pœul trovà in de di forme diferente in di deverse culture umane, indova la sgent la ghe dava una bella importanza a quell che se podeva vedé in del cel; in particolar, i indian, cines e maya gh’haveven di sistema elaborad fiss per induvinà i fat de la vita de tucc i dì a partì di moviment di pianeta e di stelle.

In la pupart de la storia, la strologia l’era considerada coma una dissiplina cademega, e cognossen almanch i nozzion pussee elementare l’era comun ind i serc di litarad, indova l’era ligada a dei oltre materie, compagne de la stronomia, alchemia, meteorologia e medesina. Tamen, a causa de l’inlumenesim, la strologia l’ha scomenzad a perder el favor e l’interess che la gh’haveva intra la cademia ozzidental, siben se saja dree a vedé un renassiment de la dissiplina a partì dei agn ’60. In India, la credenza in la strologia la ten ancamò bota e l’è ben inradisada in la cultura de la popolazzion.

Pianeta Tute i tradizzion strologeghe inn fondade sora la posizzion e i moviment di diversi corp del cel, inscì coma i eren al moment e in del sit del nassiment de un individov.

Sol El sol l’era considerad un pianeta in la concezzion strologega classega. El sò simbol l’era un serc (el disch solar) cont un pont zentral, desgià che a l’è lu midem al zenter del sistema solar e el governa el segn del Lion. El representa l’ego consapevel de una persona e i sò projezzion ind la forma de egoisem, creatività e vitalità, cont el definì inscì la natura pussee intrinsega de l’individov o oget in esaminazzion. In l’induesim a l’è imasgen de l’anima. Dessorapù, a l’è sozziad cont i moment de linsgerezza e divertiment, e cont el pader.

Luna A l’istessa fœusgia, la luna l’era considerada un pianeta anca lee ind la nozzion classega. La resg el segn del cancher e l’è ligada a la figura de la mader, ai emozzion e a la ment inconzia.

Mercuri Ligad a la comunegazzion, a l’espression e a l’intellet. El resg i segn di Sgemei e de la Versgen. L’influenza i relazzion intra i persone fisegament e emotivament arente, compagn di parent e di vesin de cà, ma anca tut quell che el pertoca a l’instruzzion.

Vener Vener la simbolesgia i fomen in sgeneral. L’influenza i relazzion sozziai, spezzialment intuitù de l’amor. L’è sozziad con la passion, l'amor e cont el besœugn de equilibri e armonia. Un bell poo de strolegh creden che Vener el sibia un’imagen de tute i carataristeghe pussee desiderabile che i omen volarissen trovà in d’una fomna.

El resg i segn del Tor e de la Balanza e l’è considerad vun di grand benefegh.

Mart Mart el resg el segn del Monton e l’influenza l’auto-stima, la raiva, la sessualitaa e, in sgeneral, tut quell che l’è ligad a l’energia. L’è considerad l’opost de Vener in del sò vesser un simbol di carataristeghe de l’om ideal per i done.

L’è considerad vun di grand malefegh.

Sgiœuv Sgiœuv el resg el segn del Sagitari e el sò simbol zodiegal l’è compagn de un quater cont una curva. L’influenza l’instruzzion, e el besœugn de libartaa e espansion personal. L’è ligad ai viasg, migrazzion e al sens de sgiustisia.

L’è considerad vun di grand benefegh.

Saturna El resg el segn del Capricorna. L’influenza el sens de la realtaa, di limitazzion, la responsabilitaa e la lonsgevitaa. El pœul menà a di sentiment fosch compagn de la tristezza e la depression ind el sò passasg ind i segn zodiegai.

L’è considerad vun di grand malefegh.

Uran L’influenza la creativitaa e la capazzitaa per la sgenialitaa. El mena a la descoverta di misteri.

Netun Ol sò simbol zodiegal a l’è un trident e el resg el segn di Pess. L’è ligad a la compassion, a l’inlusion e la vita religiosa e spiritual, inscì coma a la masginazzion e a la ment subconzia.

Pluton Ol sò passasg ind el zodiegh el mena a di bei cambiant ind la vita per via di sò qualità transformative. El ven sozziad cont el podé e la destruzzion di strolegh moderna.

Segn del zodiegh In la strologia ozzidental, vun di strument che se dopera l’è i segn del zodiegh che, concetualment, i gh’hann nissuna connession cont i constellazzion zodiegai: Monton Tor Sgemei Cancher Leon Versgen Balanza Scorpion Sagitari Capricorna Aquari Pess

Vardee anca

Referenze

*