Renz Bossi (Vares, 8 settember 1988) a l'è staa on politigh talian. Fioeu del fondator de la Lega Nord, l'Umbert Bossi, in del 2010 a l'è staa eleggiuu in del Consej regional de la Lombardia ma el se, poeu, desmettuu in del 2012, depos vess staa coinvolt in del scandol per appropriazion minga dovuda de danee che 'l vegneva dal finanziament publegh ai partii.
A gh'è staa tacada la numerada de El Truta, da inquand, in del 2008, el sò pader la ciamaa inscì per respond a chi el ghe ciedeva chi l'era el sò "delfin".
Procedur giudiziarii Appropriazion minga dovuda In de l'april del 2012, inquand ona grand inchiesta sora i finanziament del partii a l'era dree a vess fada, i procur de Milan, Napoli e Reggio Calabria hann dervii ona quaj indagen giudiziaria sora l'uso di danee publegh destinaa a la Lega Nord e gestii dal tesoree del temp, el Francesch Belsito.
Oltra 'l coinvolgiment di on quaj dirigent e amministrator del partii, comè la Rosy Mauro, el Robert Calderoli e 'l Francesch Speroni, a hinn vegnuu-fouera di indizzi relativi a l'uso minga legal de chest danee da part de la fameja Bossi.
Intervistaa dal settimannal Oggi, el Lisander Marmello, autista e guardia del corp personala del Renz Bossi, g'ha denonziaa publegament (documentando tucc cont quatter videe che gh'aveva registraa cont el sò telefon cellular, e publegaa) ona sequenza de comportament illegaj del consejer regional e de appropriazion di danee publegh doperaa da Bossi per acquist personaj. «Voeuri minga sugutà a passà danee al fioeu de l'Umbert Bossi in chesta manera: a l'è danee numerari che mi retiri di cass de la Lega a mè nòmm, sòtta la mè responsabilitaa. Luu incassa e 'l dis nagòtt, se 'l mett in saccòccia comè 'l fudess la roba pussee naturala del mond».
Depos chest scandol, el Renz Bossi el s'è desmettuu da consejer regional de la Lombardia, anca sora ricesta d'on quaj settor del partii che s'hinn attivaa per domandà el slontament da la Lega Nord.
In del magg del 2012 a l'è staa poeu iscrivuu in del register di indagaa da la procura de Milan cont l'accusa de appropriazion minga dovuda resguard ai rimbors elettoraj. Enter i spes che a gh'hinn staa notificaa a luu a gh'hinn 145 mila euro per 12 mult, duu cartej esattoriaj, l'assicurazion de la macchina e l'acquist, per 77 mila euro, del titol de laurea pasmà l'Universitaa Kristal de Tirana.
El 29 de november 2013 la Procura de Milan ha saraa formalment i indagen relativ a l'inchiesta per la gestion di danee de la Lega, in vista de la ricesta de rinvio a giudizzi per el Renz BossiGiornalettismo - Renzo Bossi indagato per peculato .
Laurea in Albania In del magg 2012, inquand la Guardia de Finanza a l'era dree a fà on contròll a Romma in de la cassafòrt de l'ex tesoree de la Lega Francesch Belsito, a l'è staa trovaa on diplòmma de laurea triennala in Gestion Aziendala, ottegnii el 29 de settember 2010 pasmà la Facoltaa de Economia de l'universitaa privada Kristal de Tirana, in Albania. Segond l'amministrazion de la facoltaa, el Bossi el se saria iscrivuu ai cors de direzion aziendala in lengua albanesa a partì da l'ann 2007-2008, prima donca de avè ciappaa el diplòmma de maduritaa.
In del luj del 2011 a hinn staa presentaa di domand de recognizion de la laurea albanesa in Italia, che poeu a hinn staa retiraa, depos di perquisizion ordinaa di procur de Milan, Napoli e Reggio Calabria e del scandol sora i appropriazion minga dovuu de l'ex tesoree Belsito.
Al principi del mes de desember 2013, insemma a alter noeuv persònn de nazionalitaa taliana, el Renz Bossi a l'è staa indagaa per corruzion e abus d'ofizzi per avè ottegnii, comè dii dal Saimir Tahiri, minister de l'Interno albanes "la laurea in scienz sociaj senza vess vegnuu nanca on dì in ateneo e [...] senza avè mai seguii i lezion in di universitaa privaa albanes".
Nòt
Categoria:Politegh italian Categoria:Nassud in Provincia de Vares Categoria:Nassud in del 1988