Elīna Garanča, nada o 16 de setembro de 1976 en Riga (Letonia), é unha mezzosoprano letoa.
Traxectoria Garanča naceu na cidade letoa de Riga no seo dunha familia de músicos, seu pai director de coro e súa nai unha cantante de lieder e profesora de canto. Súa nai Anita é profesora na Academia de Música Letoa, e profesora asociada da Academia Letoa de Cultura, unha profesora de música vocal na Ópera Nacional Letoa, así como profesora particular. Seu irmán Jānis (aka Jaanis) Garanča, tres anos maior que Elīna, comezou estudos musicais, mais actualmente é informático.
Garanča ingresou na Academia de Música Letoa en 1996 para estudar canto con Sergej Martinov. Continuou os seus estudos en Viena con Irina Gavrilović e nos Estados Unidos con Virginia Zeani.
Garanča comezou a súa carreira profesional no Südthüringisches Staatstheater en Meiningen e posteriormente traballou na Ópera de Frankfurt. En 1999 gañou a Mirjam Helin Singing Competition en Helsinqui (Finlandia).
Comezou a salientar internacionalmente en 2003 no Salzburger Festspiele cando interpretou a Annio nunha produción de La clemenza di Tito de Mozart, dirixida por Nikolaus Harnoncourt. Pronto comezou a recibir importantes papeis, como Charlotte en Werther, Dorabella en Così fan tutte na Ópera Estatal de Viena (2004) e Dorabella nunha produción en París dirixida por Patrice Chéreau (2005). En 2006 cantou de novo La clemenza di Tito, desta volta interpretando o papel de Sesto. O 12 de xaneiro de 2008, Garanča debutou coa súa propia compañía na Metropolitan Opera de Nova York no papel de Rosina en Il barbiere di Siviglia de Rossini. Sobre o seu debut, Bernard Holland escribiu en The New York Times: "A señora Garanča é unha realidade (...) As novas técnicas do canto adáptanse con dificultade ao énfase do Rossini de principios do século XIX en velocidade, brillantez e articulación, e a señora Garanča era a única sobre o escenario que parecía realmente cómoda. Garanča cantou o papel principal de Carmen no produción de 2010 da Metropolitan Opera. No concerto inaugural do Rheingau Musik Festival de 2011 na Abadía de Eberbach cantou os Sieben frühe Lieder de Alban Berg coa hr-Sinfonieorchester, dirixida por Paavo Järvi.
Está casada co director Karel Mark Chichon. A súa primeira filla, Catherine Louise, naceu o 30 de setembro de 2011.
Gravacións Entre as súas gravación salienta o Premio Grammy gañado coa gravación de Bajazet baixo a dirección de Fabio Biondi, na que interpretou o papel de Andronico. En 2005 asinou un contrato para gravar exclusivamente con Deutsche Grammophon. Entre as súas gravación sobresaen ademais:
Vivaldi: Bajazet/ Fabio Biondi, David Daniels, Vivica Genaux, Patrizia Ciofi, gravación gañadora dun Grammy Rossini: La Cenerentola / Benini, Garanca, Lawrence Brownlee, Metropolitan Opera (DVD) Bellini: I Capuleti e i Montecchi / Luisi, Anna Netrebko, Garanca Mozart: Così fan tutte / Bonney, Degout, Harding, (DVD) Mozart: La clemenza di Tito / Schade, Vesselina Kasarova, Barbara Bonney, Luca Pisaroni, (DVD) Massenet: Werther / Jordan, Marcelo Alvarez, Garanča, et al , (DVD) Bellini: Norma'' / Haider, Edita Gruberova, Garanča, et al Bel Canto - Donizetti, Bellini, Rossini / Garanča, Roberto Abbado Aria Cantilena - Villa-lobos etc. / Garanca, Luisi, Et Al Habanera - Bizet etc, / Garanča, Chichon
Temas en galego Por suxestión de César Wonenburger da Asociación Amigos da Ópera da Coruña incluíu dous temas en galego no seu repertorio, a tradicional "Vai lavar a cara" e "Lela" de Castelao. Finalmente os temas, arranxados por Juan Durán, foron gravados por encarga de Deutsche Grammophon.
Notas
Véxase tamén
Ligazóns externas
Sitio web oficial Elīna Garanča en Opera Database
Categoría:Nados en Riga Categoría:Nados en 1976 Categoría:Mezzosopranos de Letonia