San Pedro de Bembibre é unha parroquia do concello de Taboada na comarca de Chantada, na provincia de Lugo. No ano 2007 tiña 99 habitantes (47 homes e 52 mulleres), sete menos ca no ano anterior. O seu topónimo procede do galaico Paemeiobris, co significado de "oppidum entre ríos".
Xeografía Está situada no centro-norte do concello de Taboada, xusto ao norte da parroquia de San Tomé do Carballo (onde está a capital do municipio). Ten un relevo accidentado, con outeiros e vales. Abundan os carballos e os castiñeiros, aínda que en zonas sen núcleos de poboación, onde se dá máis o monte, proliferan os piñeiros e as matogueiras. Os ríos máis importantes son o rego de Portarríos, que atravesa o centro da parroquia, e o da Anguieira, que o fai polo sur.
Historia Existe constancia de presenza prerromana pola existencia dun castro (Castro da Moa) que está sen escavar.
A finais do século XII construíuse a igrexa de San Pedro de Bembibre, que pertencía a un mosteiro hoxe desaparecido.
Coa pedra deste mosteiro ergueuse, en 1413, o pazo de San Pedro de Bembibre. O seu fundador, Lope de Taboada, era orixinario de Castro Candaz, lugar que abandonou logo das incursións normandas traducidas en saqueos e ataques. No século XVII, o rei Filipe IV outorgoulle a Xoán Taboada de Ribadeneira e Figueroa o título de Conde de Taboada, que pronto había quedar vinculado ao Condado de Maceda. Este nobre, que foi representante real no Reino de Galicia, recibiu sepultura en 1681 na igrexa de San Pedro de Bembibre. A última condesa de Taboada, Amelia González de la Maza, creou a fundación Condado de Taboada, que é a que actualmente retén o seu patrimonio.
Até o ano 1898, a parte setentrional da parroquia de San Tomé do Carballo pertencía á de San Pedro de Bembibre, servindo o río da Anguieira como límite, como consta no Catastro de Ensenada.
Patrimonio
Arquitectura relixiosa A Igrexa de San Pedro de Bembibre atópase a un quilómetro do pazo-fortaleza dos condes de Taboada. De planta rectangular e con ábsida semicircular, ten un interesante retablo, conserva o púlpito no muro norte, frescos en bo estado e o sartego do primeiro conde de Taboada, Xoán Taboada de Ribadeneira e Figueroa. Foi declarada Monumento Nacional.
A capela do San Roque está situada nunha chousa do lugar homónimo. É propiedade do pazo dos condes e o seu recinto está complementado por un conxunto de cruces de pedra.
A capela de Deilás está na aldea do mesmo nome e ergueuse en honor á Virxe dos Remedios. Aquí celébrase unha novena antes do 9 de setembro, día en que se celebra a festa e, antes, tamén unha comida campestre con grande afluencia.
Arquitectura civil O pazo de San Pedro de Bembibre ou dos Condes de Taboada, construído en 1413 e residencia dos condes de Taboada dende entón. Ten unha planta en U e o aspecto dunha fortaleza: torre ameada e aspecto austero e robusto.
Galería de imaxes
Lugares e parroquias Lugares de Bembibre
Parroquias de Taboada
Notas
Véxase tamén Outros artigos Lugares de Taboada
Categoría:Parroquias de Taboada Categoría:Parroquias de Galicia baixo a advocación de san Pedro