Tajon Trevor Buchanan, nado en Brampton (Ontario, Canadá) o 8 de febreiro de 1999, é un futbolista canadense que xoga no Villarreal, da Primeira División, e na selección canadense. Coñecido pola súa velocidade e habilidade técnica, xoga normalmente como centrocampista, pero tamén pode ser despregado como lateral.
Traxectoria Naceu e criouse en Brampton, na provincia de Ontario, e conta con ascendencia xamaicana. O seu pai morreu cando tiña sete anos. Comezou a xogar ao fútbol no Brampton Youth aos oito anos, pasando logo polos Mississauga Falcons. Aos 15 anos mudouse a Colorado co seu mellor amigo e o pai deste (o seu antigo adestrador), Chrys Chrysanthou, onde se uniu á academia da USSDA Real Colorado.
Pasou dous anos xogando ao fútbol universitario na Universidade de Syracuse entre 2017 e 2018, disputando 33 partidos nos que sumou 12 goles e seis asistencias.
No verán de 2018 xogou para o Sigma FC da League1 Ontario, no que participou en sete partidos e marcou dous goles.
New England Revolution O 11 de xaneiro de 2019, Buchanan foi seleccionado no noveno lugar no SuperDraft da MLS polo New England Revolution. Debutou como profesional o 9 de marzo de 2019, nunha derrota por 2-0 contra o Columbus Crew. Marcou o primeiro gol na súa carreira o 12 de setembro de 2020, nunha derrota por 2-1 contra o Philadelphia Union.
O 3 de xullo de 2021 marcou o primeiro gol da historia do Lower.com Field, no empate 2-2 do Revolution contra o Columbus Crew.
Club Brugge En agosto de 2021 asinou un contrato de tres anos e medio co Club Brugge, campión da Primeira División de Bélxica, sendo cedido de volta ao New England Revolution para o resto da tempada 2021 da MLS.
Debutou co Brugge contra o Sint-Truiden o 15 de xaneiro de 2022.
Inter de Milán O 5 de xaneiro de 2024 fichou polo Inter de Milán, da Serie A de Italia, asinando un contrato de catro anos e medio. Converteuse así no primeiro xogador canadense da Serie A.
Debutou co seu novo club o 16 de febreiro, substituíndo a Alessandro Bastoni nunha vitoria por 4-0 sobre a Salernitana.
O 1 de febreiro de 2025 foi cedido ao Villarreal, da Primeira División de España.
O 24 de agosto de 2025 marcou un triplete nunha vitoria por 5-0 na casa sobre Girona, converténdose no primeiro canadense en marcar un hat-trick na Primeira División e no segundo canadense en marcar un nas cinco mellores ligas de Europa, despois de Jonathan David.
Selección nacional En 2021 foi convocado pola selección nacional do Canadá para os partidos de clasificación para a Copa do Mundo contra Aruba e Suriname, debutando con dous goles contra Aruba.
Notas
Categoría:Nados en 1999 Categoría:Nados en Ontario Categoría:Futbolistas do Canadá Categoría:Dianteiros de fútbol Categoría:Xogadores do Inter de Milán Categoría:Xogadores do Club Brugge KV Categoría:Xogadores do Mundial de Fútbol de 2026 Categoría:Xogadores do Mundial de Fútbol de 2022 Categoría:Xogadores da Major League Soccer Categoría:Xogadores do Villarreal CF Categoría:Xogadores da selección de fútbol do Canadá