Carlos Justino Terena, ou Carlos Terena, nado Taunay en 1954, e finado en 2021, foi un activista terena polos dereitos indíxenas. Foi coñecido por ser un dos creadores e organizadores dos Xogos Mundiais dos Pobos Indíxenas.
Traxectoria Nado en 1954 na aldea do posto indíxena de Taunay, no concello de Aquidauana, no estado de Mato Groso do Sur, no Brasil, Carlos Terena pertence ao grupo étnico indíxena terena.
De mozo, foi a Brasilia, onde puxo en primeiro plano o debate sobre os dereitos e a prevalencia das culturas indíxenas, ademais de ser un activista pola demarcación e protección das terras destes pobos. Dende moi novo, como atleta, alimentou o soño de crear un evento que reunise as diversas etnias do mundo e celebrase a cultura e a diversidade indíxenas. En 1996, en Goiânia, Goiás, este soño fíxose realidade coa primeira edición dos Xogos dos Pobos Indíxenas. Con 12 edicións nacionais e unha mundial ata o de agora, os Xogos dos Pobos Indíxenas convertéronse nun dos eventos culturais e deportivos máis importantes do mundo.
Carlos foi o responsable da metodoloxía de organización e execución do proxecto dos Xogos dos Pobos Indíxenas. Ademais, Carlos tamén foi o responsable do deseño e a planificación das identidades visuais dos Xogos, principalmente relacionadas cos logotipos do evento, e mesmo concibiu e coordinou a produción de artigos como medallas e uniformes para o evento.
Carlos faleceu o 12 de xuño de 2021, debido a complicacións da COVID-19, aos 66 anos. Porén, o Goberno federal non recoñeceu a súa morte como consecuencia directa da COVID-19. A Sesai (Secretaría Especial para a Saúde Indíxena), un organismo vinculado ao Ministerio de Sanidade e responsable dos boletíns epidemiolóxicos sobre a pandemia, non "rexistra as mortes de indíxenas pola enfermidade que se produciron fóra dos territorios recoñecidos e oficialmente demarcados". A situación crea unha disparidade contraditoria entre os datos publicados polo Goberno Federal e os recompilados polas entidades que avalían os efectos da pandemia na poboación indíxena.
Vida persoal Era o irmán de Marcos Terena. Carlos estivo casado con Terezinha Batista Ribeiro, coa que tivo dúas fillas, a xornalista Maíra Elluké e a executiva de publicidade Melissa Mõngé.
Galería de imaxes
Notas
Categoría:Nados en Aquidauana Categoría:Nados en 1954 Categoría:Activistas do Brasil Categoría:Finados en 2021 Categoría:Pobo terena