O Hockey Club Liceo da Coruña Feminino foi un equipo de hóckey a patíns con sede na Coruña, que estivo activo entre 2006 e 2023. Era a sección feminina do Hockey Club Liceo e militou durante cinco tempadas na OK Liga Feminina.
Traxectoria No ano 2006, despois de décadas de éxitos no hóckey a patíns masculino, o Hockey Club Liceo da Coruña creou por primeira vez na súa historia unha sección feminina. Con Joaquín Cairo como primeiro adestrador, o equipo comezou a competir na liga galega sénior. Na tempada 2013/14, con Stanis García no banco, o equipo proclamouse campión galego e logrou o ascenso á OK Liga Feminina, pero non chegou a ocupar a praza, o que provocou a marcha de varias das xogadoras do club. En 2016 conseguiu de novo o ascenso, tras saír vitorioso dun play-off xunto ao tamén coruñés Borbolla e o Rivas Las Lagunas.
Debutou na OK Liga na tempada 2016/17, logrando a permanencia durante o seu primeiro ano, ao rematar no décimo posto. O equipo acabou en postos de descenso na seguinte tempada (2017/18), pero puido continuar outra campaña na máxima categoría grazas ao ascenso logrado polo seu filial. Descendeu finalmente ao remate da 2018/19. Tras dous anos fóra da elite, o Liceo regresou á OK Liga en 2021, despois de se proclamar campión da OK Liga Prata.
Na tempada 2021/22, as xogadoras do club coruñés conseguiron o sexto posto na liga e clasificáronse así para disputar a Liga Europea. Encadradas no Grupo B xunto ao Manlleu e ao Noisy Le Grand francés, as liceístas fixeron historia, logrando o pase para os cuartos de final, onde caeron finalmente eliminadas ante o Palau de Plegamans ao remate da prórroga. Na liga, o Liceo obtivo a quinta posición, o mellor resultado da súa historia.
A pesar dos éxitos da súa última etapa, os problemas económicos do club provocaron o colapso do equipo feminino no seu mellor momento deportivo. A desaparición da sección foi anunciada polo club o 17 de maio de 2023, nun comunicado no que informou que a súa praza na OK Liga se cedería a unha nova entidade que se faría cargo da xestión deportiva e económica do equipo. Uns días despois anunciouse a creación do Hockey Club Coruña Feminino, entidade desvencellada totalmente do Liceo, aínda que mantendo a parte das xogadoras e do corpo técnico, e que pasará a ocupar a praza deste na máxima categoría.
Palmarés OK Liga Prata Feminina (1): 2020/21. Liga Galega (1): 2013/14.
Notas
Categoría:HC Liceo