Mariano Ondo Monsuy Angong, nado en Ayene, Guinea Ecuatorial, o 29 de xuño de 1999 e finado en Malabo o 14 de setembro de 2022, foi un futbolista ecuatoguineano que xogaba como lateral dereito. Foi internacional coa selección de Guinea Ecuatorial.
Traxectoria Formouse como futbolista no Cano Sport Academy do seu país, debutando co primeiro equipo en 2017. Ao ano seguinte trasladouse xunto ao seu compañeiro Basilio Ndong a Macedonia do Norte, onde ambos asinaron polo Shkupi. Xogou durante seis meses no club de Skopje e posteriormente regresou ao Cano Sport, no que militou tres anos, antes de instalarse en Galicia, onde estivo adestrando co Rápido de Bouzas durante a tempada 2021/22, cun visado de turista. Tras resolverse os trámites administrativos necesarios, estaba previsto que disputase co club galego a tempada 2022/23 da Terceira División RFEF, cando o xogador faleceu repentinamente durante unha concentración da selección ecuatoguineana.
Selección nacional Foi sete veces internacional coa selección de Guinea Ecuatorial, coa que debutou en 2017.
Morte Morreu o 14 de setembro de 2022, aos 23 anos de idade, mentres adestraba coa selección de Guinea Ecuatorial en Malabo. Sufriu un desmaio durante o adestramento e foi trasladado a un hospital, falecendo antes de chegar.
Notas
Categoría:Nados en 1999 Categoría:Nados en Guinea Ecuatorial Categoría:Futbolistas de Guinea Ecuatorial Categoría:Xogadores do Cano Sport Academy Categoría:Xogadores do FK Shkupi Categoría:Xogadores da selección de fútbol de Guinea Ecuatorial Categoría:Finados en 2022