Бабро́вы () — шляхецкі род. Прадстаўнікі роду паходзілі з духавенства Цвярской губерні, зрабілі кар’еру на дзяржаўнай і вайсковай службе Расійскай імперыі, у 1870-х гадах перасяліліся ў Вільню, а пасля ў Мінскую губерню.

Гісторыя Род вядомы з XIX стагоддзя. Родапачынальнік Кузьма вядомы толькі па імі па бацьку свайго сына. Яго сын Іван Кузьміч паходзіў са святарскай сям’і і скончыў Цвярскую духоўную семінарыю. З 1851 года ён знаходзіўся на дзяржаўнай службе: пачынаў у канцылярыі Цвярскога губернатара, пазней служыў у паліцэйскім упраўленні Мікалаеўскай чыгункі. У 1874 годзе Іван Баброў перайшоў на службу ў Вільню (канцылярыя губернатара, кантрольная палата), а з 1877 года быў памочнікам старэйшага ад’ютанта ў артылерыі 4-га корпуса. Удзельнічаў у руска-турэцкай вайне 1877—1878 гадоў. Даслужыўся да чыну надворнага радцы і быў узнагароджаны шэрагам ордэнаў. З 1879 года жыў у Мінску.

Яго сыны таксама абралі службовую кар’еру: Мікалай стаў вайскоўцам, вучыўся ў Акадэміі Генеральнага штаба, а Сяргей скончыў юрыдычны факультэт Маскоўскага ўніверсітэта.

Род быў прызнаны ў дваранстве пастановай Мінскага дваранскага дэпутацкага сходу ад 28 жніўня 1886 года і ўнесены ў 3-ю частку дваранскай радаводнай кнігі (дваранства, набытае выслугай чыну або ордэнам). Зацвярджэнне ўказам Сената адбылося 12 лістапада 1886 года (указ № 4749).

Вядомыя прадстаўнікі Іван Кузьміч Баброў — надворны радца, удзельнік руска-турэцкай вайны, кавалер ордэнаў Св. Уладзіміра 4-й ст., Св. Станіслава і Св. Ганны 3-й ст. з мячамі. Мікалай Іванавіч Баброў (нар. 1859) — паручнік 30-й артылерыйскай батарэі, слухач Мікалаеўскай акадэміі Генеральнага штаба. Сяргей Іванавіч Баброў (нар. 1861) — юрыст, выпускнік Маскоўскага ўніверсітэта.

Радавод

1. Кузьма 2/1. Іван (нар. да 1851), надворны радца, жыў у Мінску; жонкі — 1) Лізавета Аляксееўна, 2) Аляксандра Аляксееўна Казлоўская 3/2. Мікалай (нар. ) 4/2. Сяргей (нар. ) 5/2. Аляксандра (нар. ) 6/2. Марыя (нар. ) 7/2. Юлія (нар. ) 8/2. Міхаіл (нар. ) 9/2. Канстанцін (нар. ) 10/2. Іван (нар. )

Крыніцы

Літаратура

Катэгорыя:Шляхецкія роды Катэгорыя:Дваранства Мінскай губерні