«Pumped Up Kicks» (МПА: ; ) — песня амерыканскага гурта Foster the People. Яна была выдадзена на першым сінгле калектыву ў верасні 2010 года і пазней уключана ў міні-альбом Foster the People і дэбютную студыйную працу Torches. Кампазіцыя прынесла поспех гурту і стала адным з самых папулярных хітоў 2011 года. Песню склаў і запісаў у 2009 годзе Марк Фостэр, фронтмэн Foster the People, які ствараў у той час рэкламныя джынглы. Аптымістычная мелодыя «Pumped Up Kicks» кантрастуе з тэкстам, які апісвае думкі падлетка, які збіраецца здзейсніць масавае забойства.
Увага, якую прыцягнуў трэк, будучы выкладзеным у Інтэрнэт для вольнай запампоўкі ў 2010 годзе, дапамагло Foster the People падпісаць кантракт з лэйблам Startime International (падпадзел Columbia Records) на выпуск некалькіх альбомаў яшчэ да таго, як сінгл паступіў у продаж. У наступным годзе песня нечакана атрымала шырокую папулярнасць і загучала на радыёстанцыях рознага фармату, уключаючы CHR. «Pumped Up Kicks» узначаліла хіт-парад Alternative Songs і правяла восем тыдняў запар на трэцім месцы Billboard Hot 100. Песня атрымала высокія ацэнкі крытыкаў і была намінаваная на «Грэмі» у катэгорыі «Лепшае выкананне поп-кампазіцыі дуэтам ці гуртом», а таксама выкарыстоўвалася ў медыя.
Запіс і выпуск
Неўзабаве пасля таго, як Марк Фостэр арганізаваў гурт Foster The People у 2009 годзе, ён склаў «Pumped Up Kicks» і на працягу пяці гадзін запісаў яе на студыі Mophonics, размешчанай у Венісе (раён Лос-Анджэлес), дзе ён працаваў, ствараючы рэкламныя джынглы. Фостэр думаў, што запісвае дэма і сам сыграў на ўсіх інструментах. У выніку была выпушчаная менавіта гэтая версія.
9 лютага 2010 года з’явіўся анонс песні «Pumped Up Kicks» у музычным блогу Supergoodmusic.com, а на сайце гурта песня была размешчана для вольнай запампоўкі. Пасля гэтага трэк прыцягнуў увагу часопіса Nylon і быў выкарыстаны ім у анлайнавай рэкламнай кампаніі. У лютым гурт упершыню выканаў песню на дабрачынным канцэрце ў Венецыі.
Кампазіцыя працягвала атрымліваць ўвагу з боку розных блогаў і неўзабаве набыла стыхійную папулярнасць. Фостэру сталі прыходзіць электронныя лісты ад многіх людзей з нагоды песні, і ў сакавіку ён, маючы патрэбу ў савеце прафесіянала, звязаўся з Брэнтам Крэдэлам, музычным мэнэджэрам Monotone, Inc. Пасля ён і Брэт Уільямс былі наняты, каб разам займацца справамі Foster The People, і дапамаглі гурту заключыць кантракт з Startime International на выпуск некалькіх альбомаў. 14 верасня 2010 года адбыўся рэліз сінгла «Pumped Up Kicks».
Папулярнасьць У студзені 2011 года Foster The People выпусцілі аднайменны міні-альбом, у які увайшоў трэк «Pumped Up Kicks». 29 студзеня песня дэбютавала ў хіт-парадзе рок-песень часопіса Billboard, а праз тыдзень — і ў чарце альтэрнатыўных песень. У маі яна з’явілася ўжо ў галоўным амерыканскім рэйтынгу песень Hot 100 і ўвайшла ў дэбютны студыйны альбом калектыву пад назвай Torches, выдадзены ў тым жа месяцы.
Рэжысёр Джозэф Гейгер зняў відэакліп, у якім запіс выступу гурта перарываецца кадрамі з музыкамі, якія апроч іншага займаюцца фрысбі і сёрфінгам. У лютым 2011 года відэа было размешчана на YouTube, дзе набрала звыш 778 мільёнаў праглядаў. Яно было намініравана на прэмію MTV у катэгорыі «Лепшае рок-відэа». На тэлеканале mtvU, які вяшчае для студэнтаў, у эфір выходзіла цэнзураваная версія, у якой былі зацёртыя словы «пісталет» і «куля» ў прыпеве песні.
У ЗША песня мела паўсюдны поспех у хіт-парадах розных жанраў: да ліпеня яна дасягнула трэцяга месца ў чарце Rock Songs, а месяцам раней узначаліла Alternative Songs; у той жа час яна ўвайшла ў чарты Adult Top 40 і Mainstream Top 40. У рэйтынгу Hot 100 яна паднялася да трэцяга радка і ўтрымлівала яго на працягу васьмі тыдняў бесперапынна. «Pumped Up Kicks», будучы хітом нумар адзін у Alternative Songs, стала першым сінглам (з часоў «Use Somebody» гурта Kings of Leon), які пры гэтым увайшоў у пяцёрку Hot 100; першым хітом (з часоў «Butterfly» гурта Crazy Town), які ўзначаліў яшчэ і хіт-парад Rhythmic Airplay, і першым за ўсю гісторыю хітом, які заняў таксама вяршыню радыёчарту танцавальнай музыкі (існуе з 2003 года). Тлумачачы поспех песні, Майк Дэпіпа, менеджэр Columbia Records, адзначыў, што «яна досыць нетрадыцыйная, каб граць на многіх альтэрнатыўных радыёстанцыях, але разам з тым не занадта модная для гасцінай». На думку Кента Філіпса, праграмнага дырэктара KPLZ-FM, у дарослай аўдыторыі заўсёды ёсць патрэба ў незвычайных песнях; у якасці дадатковых прыкладаў ён прывёў «Say Hey (I Love You)» Майкла Франці і «Fireflies» Owl City, якія гучалі на радыёстанцыях фармату «adult top 40».
У верасні трэк увайшоў у дзясятку галоўных песень лета 2011 года па версіі тэлеканала VH1; пры складанні спісу ўлічваліся прагляды на YouTube і праслухоўванні на Last.fm, дадзеныя аб продажах у iTunes Store, а таксама чарты Billboard і самога тэлеканала. Сінгл атрымаў сертыфікат мультыплацінавага дыска ў ЗША, Канадзе і Аўстраліі, а таксама залатога — у Аўстрыі і Германіі. Па выніках 2011 года ён заняў шостае месца сярод самых прадаваных песень у лічбавым фармаце на радзіме музыкаў; колькасць прададзеных копій склала 3,61 млн, а ў канцы студзеня 2012-га яно перавысіла лічбу ў 4 млн. Тады ж песня ўзначаліла хіт-парад Аўстраліі на адзін тыдзень. У Вялікабрытаніі, дзе яна дасягнула 18-га месца, «Pumped Up Kicks» увайшла ў дзясятку самых прадаваных рок-кампазіцый 2011 года.
Змест У «Pumped Up Kicks» жыццярадасная музыка спалучаная з змрочным тэкстам, напісаным з пункту гледжання запалоханага і памяшанага падлетка, у якога паўсталі думкі пра забойства. Ён уяўляе сабе, як знаходзіць бацькоўскі пісталет і ў прыпеве папярэджвае патэнцыйных ахвяр, каб тыя «абганялі мой пісталет» і што ім лепш «уцякаць, і бегчы хутчэй, чым мая куля». Аб’ектам яго нянавісці сталі прасунутыя «дзеткі», чый абутак з’яўляецца ўмоўным пазначэннем моднай вопраткі.
Аднак не ўсе слухачы аказаліся ўважлівымі. «Людзі падпяваюць, насвістваюць ці яшчэ што-небудзь на працягу некалькіх тыдняў, перш чым зразумеюць, аб чым я кажу. — распавёў Фостэр. — Калі яны выяўляюць, які ў песні тэкст, гэта быццам цэбар халоднай вады для іх». У 2011 годзе, пасля таго як песня стала папулярнай, аўтару даводзілася практычна ў кожным інтэрв’ю тлумачыць сэнс песні. Па словах Фостэра, яна з’явілася па тых жа прычынах, што і «Злачынства і пакаранне» Дастаеўскага і «Халодная кроў» Трумэна Капотэ. Аўтар сказаў, што «спрабаваў зазірнуць у думкі замкнёнага, псіхічна хворага дзіцяці». Ён напісаў песню для таго, каб прыцягнуць увагу да праблемы ўзброенага гвалту сярод моладзі, які, па яго адчуванні, стаў эпідэміяй і пагаршаецца «сямейнымі праблемамі, недахопам любові і раз’яднанасцю». Удзельнікі гурта самі былі закрануты гэтай праблемай: над Фостэрам здзекаваліся ў школе, а стрыечная сястра басіста Кабі Фінка перажыла масавае забойства ў школе «Калумбайн» у 1999 годзе.
З’явіліся таксама здагадкі, што першы радок («У Роберта спрытная рука») адсылае да Роберта Хоўкінса, віноўніка стральбы ў гандлёвым цэнтры Амахі, аднак яны былі абвергнутыя агентам гурта: «Гэта зусім няправільна. Імя героя песні — гэта проста супадзенне». Некаторыя слухачы, скажона вытлумачыўшы тэкст песні, адпраўлялі скаргі ў адрас рэкорд-лэйбла і радыёстанцый, а адзін з тэлеканалаў MTV дэманстраваў відэакліп з адцэнзураваным аўдыё. Марк Фостэр растлумачыў, што песня не пра тое, як яе герой фізічна распраўляецца з непрыяцелямі, але пра адчужэнне ізгоя; гэта погляд на свет яго вачыма і «выдатная магчымасць пагаварыць з дзецьмі на тэму, якой не варта пазбягаць, пагаварыць пра гэта з любоўю».
Іншыя версіі Інструментальная версія «Pumped Up Kicks» і версія а капэла з’явіліся на баку «Б» сінгла, выдадзенага на грампласцінцы. Лічбавае выданне ўключала ў сябе рэмікс ад Chrome Canyon. У красавіку 2011 года Нью-Ёркскі дуэт the Knocks выпусціў афіцыйны рэмікс пад назвай «Pumped Up Kicks (The Knocks Speeding Bullet Remix)», які ўвайшоў таксама ў канцэртнае выданне (Tour Edition) альбома Torches. Акрамя таго, кампазіцыю рэміксавалі дуэт MNDR дыджэй Skeet Skeet.
Foster the People выконвалі песню на канцэртах і розных фестывалях. У маі 2012 года яны аб’ядналіся з групай мексіканскіх музыкаў і сыгралі версію «Pumped Up Kicks» з элементамі музыкі марыячы на выступе ў Гвадалахары, які быў зняты для праекта Эштана Кутчэра Thrash Lab.
Кавер-версіі
4 жніўня 2011 года гурт Weezer, якая праводзіла турнэ па Паўночнай Амерыцы, выканала песню на штогадовым выставе-кірмашы Orange County Fair у горадзе Коста-Меса. Музыкі Foster The People узрадаваліся, даведаўшыся пра гэта, а Марк Фостэр успомніў выпадак дзевяцігадовай даўнасці, калі на адной вечарыне Рыверс Куома вучыў яго граць на гітары «Say It Ain’t So».
У тым жа годзе кампазіцыю выканала на канцэрце група Panic! At the Disco, а The Kooks прадставілі сваю версію ў радыёпраграме Live Lounge на BBC Radio 1. Амерыканскі фолк-рокавы калектыў Oak and Gorski запісаў акустычную кавер-версію і відэасуправаджэнне да яе; трэк паступіў у продаж 6 верасня 2011 года. Крыс Кэб пераспяваў «Pumped Up Kicks» у стылі поп-рэгі. У кастрычніку 2011-га поп-дуэт Karmin выканаў яе ў вэб-відэапраграме Mashup Mondays, якая выходзіць на сайце Billboard.com, а ў наступным месяцы кавер-версію зрабіў гурт Miracles of Modern Science.
5 ліпеня 2019 года амерыканскі індастрыял-метал гурт 3TEETH прадставілі сваю версію у альбоме METAWAR.
У хіп-хопе і сучасным рытм-н-блюз Рэпер Шон Крыстафер выкарыстаў семпл з прыпеву ў трэку «All the Other Kids»; іншы рэпер — Кендрык Ламар запісаў рэчытатыў на рэміксаваны варыянт. Брэндан Грын, які выступае пад псеўданімам Bei Maejor, злажыў уласны тэкст і праспяваў яго пад арыгінальную музыку Фостэра на трэку «Little Haters», які ўвайшоў у мікстэйп MaejorMaejor. 13 чэрвеня 2012 года амерыканскі выканаўца сучаснага рытм-н-блюзу Ашэр выступіў у радыёпраграме Live Lounge на BBC Radio 1; сярод шасці кампазіцый была праспяваная і «Pumped Up Kicks», пры выкананні якой спявак змяніў свайму асноўнаму стылю і нават сыграў на бас-гітары, што стала сюрпрызам для журналістаў. У эфіры той жа радыёстанцыі A$AP Rocky праспяваў «Pumped Up Kicks» у праграме Зэйна Лоў 1 жніўня 2012 года. Летам таго ж года Джэйд Сміт, 14-гадовы сын Уіла Сміта і Джады Пінкет-Сміт, запісаў трэк «Pumped Up Kicks (Like Me)», у якім прачытаў рэп пад музыку з куплетаў арыгінальнай кампазіцыі; у чорна-белым відэакліпе Джэйд з групай падлеткаў займаюцца скейтбордынгам.
У поп-культуры Foster the People сыгралі песню ў ток-шоў «Джымі Кімэл ў прамым эфіры» 23 мая 2011 года і ў праграме «Суботнім вечарам у прамым эфіры» 8 кастрычніка таго ж года. Джымі Фэлан выканаў караоке-версію ў сваім начным шоў, пры гэтым ён парадыраваў Дэвіда Боўі. Вядомасць атрымаў відэаролік, у якім танцор Маркес Скот па мянушцы Nonstop выканаў нумар у суправаджэнні дабстэп-рэмікса «Pumped Up Kicks»; відэа было загружана на YouTube у верасні 2011-га і набрала звыш 60 млн праглядаў. Каманда сайта Barely Political зрабіла пародыю пад назвай «Ducked Up Lips» у рамках вэб-серыяла The Key of Awesome; яна ўвайшла ў падборку YouTube-пародый на гэты трэк, складзеную на сайце CraveOnline ў лістападзе 2011 года. DJ Earworm выкарыстаў семплам песні ў чарговым мешапе пад назвай «United State of Pop 2011 (World Go Boom)», у які ўвайшлі галоўныя хіты года. У выпуску ток-шоў Элен Дэджэнерэс ад 21 лютага 2012 года Тэйлар Свіфт і Зак Эфран выканалі песню пад гітару з змененым, жартоўным тэкстам. «Pumped Up Kicks» прагучала ў многіх амерыканскіх тэлесерыялах («Прыгажуні», «Пляткарка», «C. S. I.: Месца злачынства Нью-Ёрк», «Горад драпежніц», «Радзіма», «Сховішча 13», «Дзённікі вампіра») і ў фільмах 2011 года «Сэкс па дружбе» і «Ноч страху». Яна таксама ўвайшла ў саўндтрэк музычнай відэагульні Rock Band Blitz, выпушчанай у жніўні 2012 года.
Прэміі і намінацыі ГодПрэміяНамінацыяВынік2011MTV Video Music AwardsЛепшае рок-відэаQ AwardsЛепшы трэк2012«Грэмі»Лепшае выкананне поп-кампазіцыі дуэтам ці гуртомNME AwardsГімн танцпляцаBillboard Music AwardsГалоўная рок-песняГалоўная альтэрнатыўная песня
Спісы