Queens ye un distritu metropolitanu (borough) de la ciudá de Nueva York, nel estáu homónimu (Estaos Xuníos). El territoriu de Queens, que ye coestensivu col del condáu homónimu (Queens County), allúgase en Long Island, y ye'l mayor n'estensión de los cinco que formen la ciudá. Llenda con Brooklyn, nel estremu occidental de Long Island, al oeste, y col condáu de Nassau al este. Tamién tien llendes fluviales colos boroughs de Manhattan, el Bronx y Staten Island.
Con una población de 2.405.464 habitantes (Oficina del Censu, 2020Explore Census Data, na web de la Oficina del Censu de los Estaos Xuníos.) ye'l segundu condáu más pobláu del estáu tres el condáu de Kings (Brooklyn); si fora una ciudá sería la cuarta mayor del país. Cerca'l 47% de los sos habitantes nacieron nún país foriatu; de resultes, Queens ye'l llugar llingüísticamente más diversu de la Tierra, y ún de los condaos con más diversidá étnica d'Estaos XuníosLubin G, Queens has more languages than anywhere in the world — here's where they're found, artículu na web Business Insider (15 de febreru de 2017)Narula SK, The 5 U.S. Counties Where Racial Diversity Is Highest—and Lowest, artículu na revista The Atlantic (29 d'abril de 2014).Gamio L, Where America's diversity is increasing the fastest , artículu na web axios.com (4 de xunetu de 2019)..
Queens foi establecíu, en 1683, como ún de los doce condaos orixinales de la Provincia de Nueva York. El nome del asentamientu orixinal créese que ye pa honrar a la reina inglesa Catalina de Bergancia (1638-1705)New York: Geography and origins, na web ny.com.. Ente 1683 y 1899 el condáu de Queens comprendía tamién lo que güei ye'l condáu de Nassau, que se dixebró d'elli nel contestu del procesu de consolidación de la ciudá de Nueva York. Nesi mesmu procesu Queens pasó a formar una nueva entidá, el borough, a partir de lo que yeren villes (towns) distintes: Long Island City, Newton, Flushing, Jamaica y la fastera occidental de HempsteadAsh M, The Greater New York Charter as Enacted in 1897, with notes, capítulu 1, sección 2, pp. 2-3. Albany, Weed-Parsons Printing Company, 1897.. Anguaño toes elles, sacante Hempstead, son consideraos barrios de Queens.
La economía de Queens ye la más diversificada de tola ciudá. Nel so territoriu atópense los dos aeropuertos de la ciudá, el John F. Kennedy y LaGuardia, y dellos recintos deportivos y d'ociu qu'axuden a dinamizar la so economía: el parque Corona-Flushing Meadows, nel que s'alluga'l Centru Nacional de Tenis Billie Jean King, sede del Abiertu d'Estaos Xuníos de tenis; el Citi Field, l'estadiu nel que xuega los sos partidos ún de los equipos profesionales de béisbol de la ciudá, los New York Mets; los estudios de cine y televisión Silvercup; y l'hipódromu Aqueduct. Delles partes del distritu tán esperimentando un rápidu procesu de xentrificación: Flushing, poles fuertes inversiones de compañíes multinacionales chinesNgu S, ‘Not what it used to be’: in New York, Flushing’s Asian residents brace against gentrification, artículu nel periódicu The Guardian US (13 d'agostu de 2020)., y Long Island City, favorecida pola so cercanía, al traviés de la ponte de Queensboro, con Manhattan.
Nel conxuntu del distritu hai bayura de tipos d'edificación distintos, con grandes constrastes ente los barrios de les fasteres central y occidental (Ozone Park, Jackson Heights, Flushing, Astoria y Long Island City), con bloques d'apartamentos de munchos pisos d'altura, y la fastera oriental, de cases baxes y menor densidá de poblaciónShaman D, If You're Thinking of Living In/Douglaston, Queens; Timeless City Area, With a Country Feel, artículu de The New York Times (8 de febreru de 2004).Hughes CJ, Enticing Renters to Cross the Bridge to Queens, artículu de The New York Times (17 de payares de 2011)..
Referencies
Enllaces esternos
Web oficial del presidente del borough de Queens
Categoría:Nueva York