thumb|200px|As d'oros u oret O guinyote (en catalán guinyot, en castellano guiñote) ye un chuego de cartas d'a familia d'o tute y aparentau con atros como a brisca u o subhastau. Toz istos chuegos son tamién parellanos a las diferents variants d'a briscola chugadas actualment en Italia. Encara que as primeras referencias documentals apareixen mas tardi, o suyo orichen se sitúa posiblement mientres a expansión d'a Corona d'Aragón (sieglo XIV). Segurament, en os suyos ratos d'ocio, os soldaus aragoneses s'encargoron d'estendillar o guinyote en formas mas primitivas a l'actual.
Se clasifica entre os chuegos como un chuego sedentario y de mesa, con aspecto combinatorio, basau en l'azar y con información incompleta.
O guinyote se troba muit estendillau en as comunidaz autonomas d'Aragón y Navarra y ye chugau por un regular tamién en as provincias mugants de Soria, La Rioja, Cuenca, Guadalachara, Castellón y sud de Tarragona. Localment se chuga mesmo en lugars d'a provincia de Chaén (a transhumancia dende a provincia de Teruel puet estar a causa) y con a denominación de "joc de cotos" en Alcoi (provincia d'Alicant). En Aragón ye considerau cuasi un esporte nacional, celebrando-se campionatos de guinyote u guinyotadas en as fiestas d'os suyos lugars.
No ye un chuego feito pa ganar diners, ya que ye masiau lento como pa permitir apuestas; a tot tirar, a parella perdedora s'encarga de pagar o café u a consumición que se fa en o local u espacio de chuego. De feito, ye un chuego tradicional y muit popular que gosan amostrar os pais a os suyos fillos, habendo-ne mesmo campionatos de guinyote infantils en as fiestas d'os lugars. En a mayoría d'as localidaz ye o entretenimiento mas popular en as fredas tardadas d'hibierno.
Se puet fer un guinyote con dos chugadors de forma individual, pero a forma de chuego por excelencia ye con cuatre chugadors formando dos parellas. Se chuga con una baraixa espanyola a la que s'han sacau os ueitos y os nueus, quedando por tanto 40 cartas; en bels lugars, como en o Rincón d'Ademuz (provincia de Valencia) se fa con toda a baraixa (48 cartas) y en bellas zonas d'a provincia de Castellón sin os doses, u siga con 36 cartas. Os miembros d'una mesma parella se posarán a la mesa un debant de l'atro, y entre os d'a parella contraria.
Por un regular se chuga a dos chuegos, cotos u garras de tres a cinco partidas cadagún, ganando a parella que fa primero dos cotos.
En l'actualidat ye posible guinyotiar tamién a traviés de cuantas plataformas en linia contra bots u contra atros guinyoters y guinyoteras.
Vocabulario Arrastrar. Mientres l'arrastre, salir d'un palo pa que a resta de chugadors haigan de chugar-lo, mas que mas si ixe palo ye trunfo. Arrastre. Fase d'a partida en que ya no quedan cartas en o mazo pa robar, y en a que ye obligatorio continar d'o palo de que se sale. Aturar. Rematar a partida cuan belún tien os puntos pa obtener a victoria. Baza. As cartas que i hai dencima d'o tapet que se leva a parella que ha matau. Brisca. Un as u un tres, que son as cartas con mas puntos. Buenas. Tener mas de 50 puntos en o primer recuento. A os puntos aconseguius, les ne resta 50 y se dicen buenas. Eix: 32 buenas = 82 puntos. Cargar. Chitar carta con puntos cuan o companyero gana a baza. Cantar. Tener o rei y a sota d'o mesmo palo en mano, y declarar-lo pa anotar-se 40 puntos si o palo ye trunfo, u 20 puntos en atro caso. Coto. Conchunto de 3 a 5 partidas en total. Pa ganar o coto cal ganar 3 partidas. Cotón. Ganar dos cotos. Descartar-se. Sacar-se todas as cartas d'un mesmo palo d'a man. Fallar. No tener d'o palo de que s'arrastra. Fer las ultimas. Diez puntos daus a qui se leva a zaguera baza. Guinyote. Un as u un tres, que son as cartas con mas puntos. Malas. No tener mas de 50 puntos en o primer recuento. A os puntos obtenius, le'n diz malas. Eix: 47 malas = 47 puntos. Matar. Chugar una carta que supera a la que en l'inte domina en a baza. O zaguer chugador que mata se leva a baza, y si degún no mata, la gana qui ha saliu. Mano. Chugador que sale en a primera baza y ye o siguient a o que ha repartiu as cartas. Mazo. Montón de cartas d'a on se roban as mesmas. Palo. Oros, copas, espadas u bastos. Partida. Se produce cuan belún tien 51 buenas. Partida de vueltas u partida d'arrastre. Se produce cuan dengún no ha puesto arribar a 51 buenas. En ixe caso, se fa una segunda partida dica que belún tienga as 51 buenas. Renuncio. No chugar una carta que o reglamento obliga a chugar, ya siga por descudio u no pas. Por un regular escaice cuan l'adversario no chitó un palo en l'arrastre cuan heba d'haber-lo chitau. Si se fa un renuncio, se da a partida a l'atro equipo. Robar. Pillar una carta d'o mazo dimpués de cada baza mientres queden. Salir. Salir d'una carta ye chugar ixa carta qui chuga primero en una baza, que corresponde con qui ha ganau a baza anterior, fueras d'a primera baza en que sale qui ye man. Marcar. En a partida "de vueltas" u "d'arrastre" chitar bella fegura u carta que indique a o companyero que levas l'as de trunfo (pa que "cargue"), u bel "cante" (as 20 u as 40 que permita ganar a partida. Trunfar. O palo que ye trunfo. Eix: trunfan bastos. Trunfo. Palo que mata a toda a resta, y que se determina con a carta siguient a las repartidas de dentrada a os chugadors. Ultimas. Encara que puet referir-se a la zaguera baza de tot o chuego, ye mas común decir asinas a la zaguera baza antis de l'arrastre. Ir d'ultimas se refiere a chugar ista zaguera baza antis de l'arrastre. Ye normal no matar cuan se fa.
Referencias
Se veiga tamién Chuego de cartas
Vinclos externos Artíclos sobre o chuego d'o guinyote.
Categoría:Chuegos de cartas Categoría:Chuegos tradicionals d'Aragón