António Sebastião Ribeiro de Spínola, naixito d'Estremoz (districto d'Évora, Reino de Portugal) l'11 d'abril de 1910 y muerto en Lisbona o 13 d'agosto de 1996, estió un militar y politico portugués, primer President de Portugal dimpués d'a dita Revolución d'os Clavels.
Encara que d'ideolochía conservadora (estió mesmo observador mientres a Segunda Guerra Mundial en o Frent Oriental en as filas d'a Wehrmacht en o seche de Leningrado, a on se trobaban os voluntarios espanyols d'a División Azul) y colaborador d'a Dictadura d'António de Oliveira Salazar (estió combatient voluntario en Angola, Gubernador militar en Guinea-Bissau y Comandant en Cabo de l'Exercito portugués), ya dende prencipios d'os anyos 1970 escomencipió o suyo distanciamiento d'o rechimen dictatorial, dica que o 25 d'abril de 1974 estió qui, en nombre d'o Movimento das Forças Armadas, recibió a rendición de Marcelo Caetano, o zaguer líder d'a dictadura. En estar asinas una d'as caras conoixitas d'a Revolución, presidió a Junta de Salvação Nacional y se convertió en o 15 de mayo de 1974 President de Portugal. Sindembargo, en no cuacar-li a ideolochía de cuchas d'a mayor parte d'os militars revolucionarios, dimitió o 30 de setiembre de 1974, dimpués de fracasar un intento de golpe d'estato o 28 de setiembre a on pareix que simpatizaba con os golpistas. Cuan l'11 de marzo de 1975 fracasó unatro intento de golpe d'estato de dreitas, Spínola se refuchió en Espanya (gobernata alavez por Francisco Franco) y luego en Brasil.
Se convertió en o suyo exilio en president d'o Exército de Libertação de Portugal, una organización d'estrema dreita de caracter terrorista. Sindembargo, en zaguerías d'os anyos 1980, en tiempos d'o president Mário Soares, se reconoixió o suyo papel en os primers intes d'a Revolución d'os Clavels.
Obras 1970: Por Uma Guiné Melhor. 1971: Linha de Acção. 1972: No Caminho do Futuro. 1973: Por Uma Portugalidade Renovada. 1974: Portugal e o Futuro. 1976: Ao Serviço de Portugal. 1978: País sem Rumo.
Categoría:Militars de Portugal Categoría:Presidents de Portugal Categoría:Primers ministros de Portugal Categoría:1910 (naixencias) Categoría:1996 (muertes)